Yangi ta’sischi direktor o‘rinbosari, bosh buxgalter va filial rahbarini ham ishdan bo‘shata oladimi?
Ma’lumki, MK 489-moddasi birinchi qismi 1-bandiga asosan: tashkilot mulkdori o‘zgarganligi munosabati bilan tashkilot rahbari, uning o‘rinbosarlari, tashkilot bosh buxgalteri, tashkilot alohida bo‘linmasi rahbari bilan tuzilgan mehnat shartnomasi ish beruvchining tashabbusiga ko‘ra bekor qilinishi mumkin.
Tashkilot rahbari tushunarli, uni shundog‘** tashkilot mulkdori, ya’ni yangi mulkdor (ta’sischi yoki aksiyadorlar) yoki u vakolat bergan shaxs bo‘shatishi mumkin.
Lekin bu vaziyatda tashkilot rahbar o‘rinbosari, bosh buxgalter va alohida bo‘linma rahbari bilan mehnat shartnomasini kim bekor qiladi?
MK 170-moddaning birinchi qismida “mehnat shartnomasini bekor qilish ishga qabul qilish huquqiga ega bo‘lgan shaxslar tomonidan amalga oshiriladi va ish beruvchining buyrug‘i bilan rasmiylashtiriladi” deyilgan.
Tashkilot rahbari o‘rinbosari, bosh buxgalter va alohida bo‘linma rahbarini ishga qabul qilgan shaxs mulkdor emas, tashkilot direktori bo‘lsa, demak, bu shaxslarni ishdan bo‘shatishni ham yangi mulkdor emas, shu direktor amalga oshiradimi?
Xop, shunday deylik. Yangi mulkdor (ta’sischi, muassis, aksiyador) MK 489-moddasi birinchi qismi 1-bandi bo‘yicha yuqoridagi shaxslarni ishdan bo‘shatishni hoxlayapti, biroq, uning tashabbusini tashkilot rahbari rad etsachi. “Siz baribir meni ham bo‘shatasiz, shunday ekan, men o‘rinbosarim yoki bosh buxgalterimni ishdan bo‘shatib, sizga “qulaylik” yaratmoqchimasman. Bularni men ishga qabul qilganmanmi, men o‘zim bo‘shataman, siz emas” desachi? Ish bitmay qoladiku, unda. MK 489-modda ishlamay qoladiku.
Do‘stlar, e’tibor bering. Mehnat kodeksining 23-moddasi 5-qismida tashkilotning mulkdori Qonunga, mehnat haqidagi boshqa huquqiy hujjatlarga, tashkilotning ta’sis hujjatlariga va ichki hujjatlarga muvofiq ish beruvchining mehnatga oid munosabatlardagi huquq va majburiyatlarini amalga oshirishi mumkinligi ko‘rsatilgan.
Ya’ni, tashkilot mulkdori o‘zgarganda, yangi mulkdor birinchi rahbar, uning o‘rinbosari, bosh buxgalter va tashkilot alohida bo‘linmasi rahbari bilan tuzilgan mehnat shartnomasini mulkdor o‘zgarganligi munosabati bilan bekor qilishda bu xodimlar uchun ish beruvchi maqomiga ega bo‘la oladi.
Buning asosi MK 23-modda 5-qismi (undagi “qonunga muvofiq” jumlasi) va MK 489-modda birinchi qism 1-bandi (ya’ni, qonun)dir.
Shunday ekan, tashkilot mulkdori o‘zgarishi munosabati bilan MK 489-modda 1-qismi
1-bandiga ko‘ra nafaqat tashkilot rahbarini, balki uning o‘rinbosari, bosh buxgalteri va alohida bo‘linma rahbarini ishdan bo‘shatish ham to‘g‘ridan to‘g‘ri yangi mulkdor tomonidan amalga oshirilishi mumkin degan fikrdamiz.
