Uy-joy otam nomida, otam vafot etgan bo‘lsa-da, soliq uning nomiga kelyapti. Soliqni to‘lashimiz kerakmi?
@Yurist_Xizmati 4369-savol:
Assalomu alaykum savolim shundan iboratki otam 2019 yil vafot etgan lekin yer va mulk solig‘iga 2024 yilda otamga qarzdorliklar kelib chiqyapti. Qonun bo‘yicha to‘lashimiz kerakmi? Qonunning qaysi moddasida ko‘rsatilgan? Vafot etgan odamga qarzdorlik kelishi mumkinmi? Iltimos tezroq javob bering Majburiy ijro bir kun muhlat bergan.
YURIST JAVOBI:
Agar uy-joy otangiz vafotidan keyin merosxo‘rlar tomonidan undan qolgan mol-mulk egallamagan, soddaroq aytganda uy-joy va yer merosxo‘rlardan birining nomiga o‘tmagan bo‘lsa, qarzdorlik otangiz nomiga kelishi tabiiy. Chunki soliq bazasida mulkdor sifatida otangiz turgan.
Soliq kodeksi qoidalariga muvofiq mol-mulk va yer solig‘ining to‘lovchi shu yer uchastkasi va mol-mulk nomida bo‘lgan jismoniy shaxs hisoblanadi. Undan tashqari Soliq kodeksining 87-moddasiga muvofiq vafot etgan yoki vafot etgan deb e’lon qilingan jismoniy shaxsning soliq qarzi ushbu Kodeksning 94-moddasida belgilangan tartibda meros mol-mulkning qiymati doirasida merosxo‘rlardan undiriladi.
♂️ Bunda SK 94-moddasiga asosan jismoniy shaxsning soliqlar bo‘yicha uzilmay qolgan qarzi vafot etgan shaxsning meros qilib olinadigan mol-mulkini meros qilib olish tartibida qabul qilib olgan uning merosxo‘ri (merosxo‘rlari) tomonidan meros qilib olinadigan mol-mulkning qiymati doirasida va uning (ularning) merosdagi ulushiga mutanosib ravishda uziladi.
Qarang! ushbu moddaning to‘rtinchi qismiga asosan soliq qarzi bo‘lgan jismoniy shaxs vafot etgan taqdirda, mazkur jismoniy shaxs hisobga qo‘yilgan joydagi va (yoki) uning mol-mulki turgan joydagi soliq organi vafot etgan shaxsning merosxo‘ri (merosxo‘rlari) to‘g‘risida axborot olingan paytdan e’tiboran bir oy ichida unga (ularga) soliq qarzi mavjudligi to‘g‘risida xabar qilishi shart.
✅ Demak, soliq organi otangiz vafot etganini bilgan vaqtdan e’tiboran 1 oylik muddat ichida sizlarga xabar berishi kerak.
❗️Bunda vafot etgan jismoniy shaxsning merosxo‘ri (merosxo‘rlari) mazkur jismoniy shaxsning soliqlar bo‘yicha qolgan qarzini meros qabul qilib olingan kundan e’tiboran bir yildan kechiktirmay uzishi shart.
✅ Shunga ko‘ra sizlar kelib chiqqan soliq qarzdorligini 1 yil ichida to‘lashingiz lozim.
