Xotin nikoh davomida olingan avtomashinani boshqa birovga sotmoqchi, biroq uning eri vafot etgan...
“Notariuslar tomonidan notarial harakatlarni amalga oshirish tartibi to‘g‘risida”gi yo‘riqnomaga o‘zgartirish va qo‘shimchalar kiritildi hamda 2024 yil 24 yanvarda 3113-9-son bilan davlat ro‘yhatidan o‘tkazildi.
Bunda eng qiziq va muhim joylaridan biri er va xotin o‘rtasida umumiy mulk bo‘lgan ko‘chmas mulk va avtotransport vositasini boshqa shaxsga o‘tkazish bitimlarini tasdiqlashda ayrim talablar belgilandi.
Jumladan Yo‘riqnomaning yangi o‘zgartirilgan 29-bandiga qaraymiz:
“Er (xotin)ning umumiy birgalikdagi mulki bo‘lgan ko‘chmas mulk va avtomototransport vositasini boshqa shaxsga o‘tkazish bo‘yicha bitim tuzish uchun xotinning (erning) notarius, Qonunning 26-moddasida sanab o‘tilgan mansabdor shaxslar yoki O‘zbekiston Respublikasi konsullik muassasalarining konsullari tomonidan shahodatlantirilgan yozma roziligi olinishi lozim.
Ko‘chmas mulk va avtomototransport vositasini boshqa shaxsga o‘tkazayotgan fuqaro eri yoki xotini yo‘qligi (beva ekanligi yoki bo‘ydoq) haqida yozma ariza taqdim etganda, notarius bitimning ikkinchi tarafini ariza bilan tanishtiradi va huquqiy oqibatini tushuntiradi. Ikkinchi taraf arizaga familiyasi, ismi, otasining ismini to‘liq yozib, imzo qo‘yadi.
Ushbu holatni aniqlashda notariusga tegishli ravishda quyidagi hujjatlar asos bo‘ladi: fuqaroning pasporti, (identifikatsiya ID-kartasi) nikohdan ajralganlik haqidagi guvohnoma yoki o‘lim haqidagi guvohnoma, o‘lim holati fuqarolik holati dalolatnomalarini yozish organlarida qayd qilinganligi haqida tibbiyot muassasalari tomonidan berilgan QR-kod (matrik shtrixli kod) tasviri tushirilgan ma’lumotnoma va nikoh tuzilganligi haqidagi guvohnoma yoxud dalolatnoma yozuvlaridan ko‘chirmalar.
Ushbu ariza ko‘chmas mulk va avtomototransport vositasini boshqa shaxsga o‘tkazayotgan fuqaroning shaxsan o‘zi tomonidan beriladi, bitim vakil orqali tuzilgan taqdirda esa u tomonidan ishonchnoma beruvchining eri yoki xotini yo‘qligini tasdiqlovchi hujjatlar taqdim etilgan holda vakildan bunday ariza olinadi.
Bunda, mulkdorning eri yoki xotini yo‘qligi haqidagi ma’lumotlar, nikoh tuzilganligi, nikohdan ajralganlik va o‘lim haqidagi fuqarolik holati dalolatnoma yozuvlari bilan bog‘liq barcha ma’lumotlar notariuslar tomonidan mustaqil ravishda, fuqarolardan ortiqcha ma’lumot talab qilmasdan, “FHDYOning yagona elektron arxivi” axborot tizimi orqali tekshiriladi hamda tekshirish natijalari to‘g‘risidagi ma’lumotnoma Tizimda saqlanadi".
Ushbu o‘zgartirishlar 2024 yil 25 yanvardan kuchga kirdi.
