MCHJ ishonchli boshqaruvchiga berilsa, direktorning taqdiri nima bo‘ladi?
Menga savol yuborishdi: Agar MCHJning boshqaruvi ishonchli boshqaruvga berilsa, bungacha ishlab kelgan ijrochi direktorning taqdiri nima bo‘ladi?
MCHJ bo‘ladimi, AJ bo‘ladimi, ularning boshqaruvi ishonchli boshqaruvga berilishi, tashkilotning ijro vakolati, ya’ni ijrosi direktorning vakolatlari ishonchli boshqaruvchiga beriladi deganidir.
Mehnat kodeksining 485-moddasi ikkinchi qismida “ushbu paragrafdagi qoidalar, tashkilotlarning tashkiliy-huquqiy shakllaridan, mulk shakllaridan va idoraviy bo‘ysunuvidan qat’i nazar, tashkilotlar rahbarlariga nisbatan tatbiq etiladi, bundan quyidagi hollar mustasno, agar:
tashkilot rahbari yagona ishtirokchi (ta’sis etuvchi), tashkilot mol-mulkining yagona mulkdori bo‘lsa;
tashkilotni boshqarish boshqa tashkilot (boshqaruvchi tashkilot) bilan shartnoma asosida amalga oshirilsa” deyilgan.
Ya’ni, amaldagi MKda tashkilotni boshqa bir tashkilot boshqaruviga, yanada aniqrog‘i, ishonchli boshqaruviga topshirilishiga oid qoidalar bor.
Tashkilot ishonchli boshqaruvga berilganida, tashkilot va ishonchli boshqaruvchi o‘rtasidagi munosabatlar mehnat emas, fuqarolik-huquqiy munosabati sifatida namoyon bo‘ladi. Bu borada Fuqarolik kodeksining 849-861-moddalari butun boshli mol-mulkni ishonchli boshqarish shartnomasi qoidalariga bag‘ishlangan.
Asosiy masalaga keldik: tashkilot, jumladan, MCHJ yoki AJni boshqarish ishonchli boshqaruvchiga topshirilganida, ishonchli boshqaruvchiga tashkilotni ijro etish vakolati o‘tadi, shu munosabat bilan shu vaqtga qadar ishlab turgan ijrochi direktorning vakolati tugatiladi.
Boshqacha aytganda, MCHJ ijrochi direktorining lavozimi tugatiladi, mehnat qoununchiligi tilida buni shtat va lavozim qisqartirishi deymiz.
Bunday hollarda ijrochi direktor bilan tuzilgan mehnat shartnomasi MK 161-moddasi ikkinchi qismi 2-bandiga asosan shtat yoki lavozim qisqarishi munosabati bilan, ish beruvchi tashabbusiga ko‘ra bekor qilinadi.
Agar uning malakasi va mutaxassisligiga mos bo‘lgan bo‘sh ish joyi bo‘lmasa, yoki o‘sha direktor bunday ishga o‘tish haqidagi taklifni rad qilsa albatta (MK 144-moddasi).
