2 yoshlik "advokat" haqida eshitganmisiz?
Ish beruvchi Nilufarni 3 oylik sinov muddati bilan ishga oldi, lekin 2-oydayoq sinovdan o‘ta olmadi deb ishdan bo‘shatib yubordi. To‘g‘ri, xodim sinov davrida ishini uddalay olmagan va bu bo‘yicha barcha hujjatlar rasmiylashtirilgan. Buyruq ham, MK 132-modda (dastlabki sinov natijasi) hamda 170-modda (mehnat shartnomasini bekor qilishni rasmiylashtirish) bo‘yicha tuzilgan. MK 132-moddaning birinchi qismiga asosan xodimga kamida 3 kun oldingi ogohlantirish ham berilgan.
Lekin, buni qarangki sudda ish beruvchi yutqazib qo‘ydi va xodim ishga tiklandi. Ho‘sh, nega?
Sababi, juda oddiy. MK 129-moddaga asosan 3 yoshga to‘lmagan bolasi bor ayollarni ishga qabul qilishda dastlabki sinov muddati belgilash mumkin emas.
Nilufarning 2 yoshlik o‘g‘li bor edi va demakki, unga dastlabki sinov qo‘yilishi mutlaqo noqonuniy bo‘lgan. O‘z-o‘zidan dastlabki sinov natijasiga ko‘ra ishdan bo‘shatish ham noto‘g‘ri bo‘lgan. Ya’ni, sud xodimni ishga tiklab to‘ppa-to‘g‘ri qilgan.
Mana joyida Nilufarning 2 yoshli o‘g‘li Boburjon ilk advokatlik xizmatini ko‘rsatib, o‘z onasini ishga tiklab bergan bo‘ladi.
