10 yillik alimentni undirishim mumkinmi?
✅ Agar 10 yillik aliment qarzdorligi bo‘lsa, undirishingiz mumkin. Oila kodeksining 139-140-moddalari mazmuniga ko‘ra agar aliment to‘lovchining qarzdorligi mavjud bo‘lsa, unda siz MIB orqali bu qarzdorlikni undirishingiz mumkin. Bunda aliment qarzdorligi necha yil ekanligining ahamiyati yo‘q.
❌ Biroq siz birinchi marta aliment undirish haqida so‘rayotgan bo‘lsangiz, unda 10 yillik alimentni undira olmaysiz.
Buni quyidagicha tushuntiramiz. Umumiy qoidaga ko‘ra Oila kodeksi 136-moddasi uchinchi qismiga binoan aliment sudga murojaat etilgan paytdan boshlab undiriladi.
Endi qarang! ushbu moddaning to‘rtinchi qismida agar ta’minot uchun mablag‘ olish choralari sudga murojaat qilingunga qadar ko‘rilganligi, ammo aliment to‘lashi shart bo‘lgan shaxsning uni to‘lashdan bosh tortganligi oqibatida aliment olinmaganligi sud tomonidan aniqlansa, o‘tgan davr uchun aliment sudga murojaat etilgan paytdan boshlab uch yillik muddat doirasida undirib olinishi mumkinligi belgilangan.
Ushbu normaning mohiyatini quyidagicha tushuntiramiz. “Ta’minot uchun mablag‘ olish choralari” tushunchasi o‘z ichiga er-xotin aliment haqida kelishuvga erishgan yoki erishmaganligi, xotinning(yoki erning) erga(yoki xotinga) aliment to‘lash haqida ma’lum qilgan (bir necha yil davomida yoki 2-3 yil oldin)yoki qilmaganligi, agar ma’lum qilgan bo‘lsa-yu er rad etib kelganligi kabilarni oladi.
✅ Shunday ekan, sizdagi vaziyatda agar siz avval hech bo‘lmaganda bir marta sobiq turmush o‘rtog‘ingizga aliment to‘lashi haqida aytgan bo‘lsangiz, 3 yillik muddatni qo‘llab aliment undirish mumkin.
