Avvalgi ishidan bo‘shagan kunidan 2 yil o‘tgan hokim yordamchilari avvalgi ishiga qayta olmaydimi?
Prezidentning 2021 yil 3 dekabrdagi “Mahallada tadbirkorlikni rivojlantirish, aholi bandligini ta’minlash va kambag‘allikni qisqartirish bo‘yicha davlat siyosatining ustuvor yo‘nalishlari to‘g‘risida”gi PF-29-sonli farmoni 6-bandida:
“vazirliklar, idoralar, tijorat banklari, mahalliy ijro hokimiyati organlari rahbarlariga hokim yordamchilari lavozimiga tayinlangan xodimlarning avvalgi ish joyidagi lavozimini ikki yilgacha muddatga saqlab qolish, mazkur davrda ushbu lavozimga boshqa shaxslarni muddatli mehnat shartnomasi asosida vaqtincha ishga qabul qilish tavsiya etilsin” deyilgan.
Ko‘rdikki, yuqoridagi tavsiyani qabul qilgan ish beruvchilar hokim yordamchiligiga ishga o‘tmoqchi bo‘lgan xodimini o‘sha vaqtdagi eski Mehnat kodeksining 97-moddasi 1-bandi bilan taraflar kelishuviga ko‘ra ishdan bo‘shatgan.
Bunda taraflarning mehnat shartnomasini bekor qilish haqidagi kelishuvida haqiqatdan ham ishdan bo‘shagan xodimning ish joyini 2 yilgacha muddatda saqlab turilishi va bu lavozimga boshqa shaxslarni ana shu ikki yilgacha muddatga ishga qabul qilinishi ko‘zda tutilgan.
Yuqoridagi imtiyoz, ya’ni 2 yil ichida o‘z ishiga qaytish imkoniyati mana shunday amaliyot bilan ishdan bo‘shatilgan va o‘zaro kelishuvlarda ish joyini saqlab turish majburiyati belgilangan hokim yordamchilariga tegishli deb hisoblaymiz.
Biroq, bu vaziyatda avvalgi ish beruvchidan ishdan bo‘shab, hokimiyatda ish boshlagan juda ko‘plab hokim yordamchilari ushbu imtiyozning amal qilish muddati avvalgi ish beruvchidan bo‘shagandan boshlab 2 yil ekanini e’tiborga olmadilar.
Bu yerda gap asosan, 2022 yil 1 yanvargacha hokim yordamchiligiga o‘tgan shaxslar haqida ketyapti.
Masalan, qaysidir tumandagi bankdan 2021 yil 20 dekabrda ishdan bo‘shagan va 21 dekabrdan hokimiyatga hokim yordamchiligiga ishga qabul qilingan shaxsning avval ishlagan bankiga qaytish muddati ayni vaqtda o‘tib bo‘lgan.
Nimaga? Chunki bugun 2024 yil 25 yanvar, PF-29-sonli farmonda va taraflar kelishuvida ko‘rsatilgan “avvalgi ish joyidagi lavozimini 2 yilgacha saqlab turish” muddati tugab bo‘lgan va shu sababli avvalgi ish beruvchining bunga doir majburiyati ham o‘z ahamiyatini yo‘qotgan.
Hozirgi vaqtda shunga o‘xshash vaziyatda bo‘lgan hokim yordamchilari PF-29-sonli farmon bilan belgilangan avvalgi ishiga qaytish imkoniyatini qo‘ldan boy berib bo‘lgan deb hisoblaymiz.
