Kasaba uyushmasi qo‘mitasining vakolat muddati 5 yil!
Hurmatli davlat tashkilotlarida ishlovchi "kadrovik"lar, sizlar mehnat shartnomasini ish beruvchi tashabbusiga ko‘ra bekor qilishda kerakli vaqtda kasaba uyushmasi qo‘mitasi roziligini olyapsizlar. Biroq, bir narsaga e’tibor bermayapsizlar.
Kasaba uyushmalari federatsiyasiga qo‘shilgan tarmoq kasaba uyushmalari kengashlari 2020 yil davomida o‘z ustavlarini yangi tahrirda tasdiqlagan. Bundan tashqari, ushbu kasaba uyushmalari kengashlari ularga a’zo bo‘lgan mehnat jamoasida (tashkilotlardagi) faoliyat yuritadigan kasaba uyushma qo‘mitalari faoliyatini tartibga soluvchi Boshlang‘ich kasaba uyushmalari tashkilotlari to‘g‘risidagi nizomlarni ham tasdiqlagan.
E’tibor bering, ana shu Ustav va Nizomlarda kasaba uyushmalariga a’zo bo‘lgan xodimlar (mehnat jamoasi) tomonidan saylangan kasaba uyushmasi qo‘mita a’zolarining vakolati muddati 5 yil ekanligi ko‘rsatilgan.
Va ushbu 5 yillik muddat tugagan bo‘lsa, kasaba uyushmasi qo‘mitasi a’zolari, shu jumladan, qo‘mita raisiining vakolati ham tamom bo‘lishi qayd etilgan.
Bu agar sizdagi kasaba uyushmasi qo‘mitasi misol uchun, 2018 yilda saylangan bo‘lsa, bugungi kunga kelib ushbu qo‘mita a’zolarining vakolati tugagan va ular kasaba uyushmasi qo‘mitasi sifatida hech qanday yuridik harakat qilolmaydi deganidir.
Bilsangiz, vakolat muddati tugagan kasaba uyushma qo‘mitasining xodimni ishdan bo‘shatishga bergan rozilik qarori ham haqiqiy emas.
Demak, o‘zimizdagi “profsoyuz” tarkibi qachon saylanganligini bir qator ko‘rib chiqamiz va agar haqiqatdan ham vakolat muddati tugaganligi aniqlansa, tarkibni qaytadan saylash haqida o‘ylashimiz kerak.
