Tashkilotga kasaba uyushmasi qo‘mitasi bo‘lmasa, xodimni bo‘shatish qanday bo‘ladi?
Gap mehnat shartnomasini ish beruvchi tashabbusiga ko‘ra (MK 161-moddasiga asosan) bekor qilishdan avval kasaba uyushasi qo‘mitasi roziligini olish haqida ketyapti.
Bilasiz, agar jamoa kelishuvi yoki jamoa shartnomasida mehnat shartnomasini ish beruvchi tashabbusiga ko‘ra bekor qilishda kasaba uyushmasi qo‘mitasi roziligini olish ko‘rsatilgan bo‘lsa, bunday rozilik olmay turib, shartnomani bekor qilib bo‘lmaydi (MK 164-modda).
Tasavvur qiling, “A” tashkilotning jamoa shartnomasida ana shunday talab ko‘rsatilgan, biroq, bu tashkilotda kasaba uyushmasi qo‘mitasi ham, xodimlarning boshqa vakillik organi ham tuzilmagan.
Ko‘pchilik “bo‘ldi, bunaqa holatlarda kasaba uyushmasi qo‘mitasi roziligini olish shart emas, chunki uning o‘zi yo‘qku” deb o‘ylaydi.
Xo‘sh, bu fikr to‘g‘rimi?
Do‘stlar, bunday vaziyatlarda biz Mehnat kodeksining 15-moddasi 5-qismidagi mana bu qoidalarga rioya qilamiz:
➖tashkilotda kasaba uyushmasi qo‘mitasi tashkil etilmagan hollarda ish beruvchi qonunchilikka muvofiq kasaba uyushmasi qo‘mitasi bilan kelishib olinishi kerak bo‘lgan masalalarni hal qilish niyati to‘g‘risida mehnat jamoasini yozma shaklda xabardor qilishi shart;
➖agar axborot olingan kundan e’tiboran ikki hafta ichida mehnat jamoasining boshlang‘ich kasaba uyushmasi tashkilotini yoki xodimlarning boshqa vakillik organini tashkil etish to‘g‘risidagi qarori qabul qilinadigan umumiy yig‘ilishi (konferensiyasi) o‘tkazilmasa, ish beruvchi tegishli masalalarni mustaqil ravishda hal qilishga haqlidir.
1. Demak, biz ko‘rib chiqayotgan vaziyatda ish beruvchi mehnat jamoasiga yozma murojaat qiladi va ushbu murojaatida xodimni ish beruvchi tashabbusi bilan ishdan bo‘shatmoqchi ekanini, lekin buning uchun jamoa shartnomasiga ko‘ra kasaba uyushmasi qo‘mitasi yoki boshqa vakillik organi roziligi kerakligini ko‘rsatib o‘tadi.
Yuqorida mehnat jamoasi deganimizda, tashkilotda mehnat shartnomasi asosida mehnat faoliyatini amalga oshirayotgan barcha xodimlarni tushunamiz.
2. Yozma murojaatdan so‘ng mehnat jamoasi 2 xafta ichida kasaba uyushmasi qo‘mitasi yoki xodimlarning boshqa vakillik organini tashkil etish bo‘yicha umumiy yig‘ilish o‘tkazmasa, TAMOM!
Bunday holatlarda ish beruvchi xodim bilan tuzilgan mehnat shartnomasini hech kimdan rozilik so‘ramasdan, mustaqil tarzda bekor qilaveradi.
