MЕNGA BOLNICHNIY”PULI 100% TO‘LANADIMI
Man maktabda ingliz tili ukituvchisi bulib ishlayman. Fevraldan dikretdan kaytdim. 6 oylik chakalogim bor. Man 10 kunlik bolnichniyga chikkandim. Manga oyligimga uzgarish buladimi. 2 yoshgacha bolasi bor xodimlarga bolnichniy oylikka teng xolda tulanadi deb eshitgandim. Shu rostmi? Agar rost bulsa kaysi karor yoki kodeks asos buladi.
JAVOB:
O‘zbekiston Respublikasi mehnat va aholini ijtimoiy muhofaza qilish vazirining 1136-son buyrug‘i bilan tasdiqlangan “Davlat ijtimoiy sug‘urtasi bo‘yicha nafaqalar tayinlash va to‘lash tartibi to‘g‘risida”gi Nizomga ko‘ra, vaqtincha mehnatga qobiliyatsizlik nafaqasini tayinlash uchun faqat belgilangan tartibda berilgan vaqtincha mehnatga layoqatsizlik varaqasi (kasallik varaqasi) asos bo‘ladi.
Shuningdek, vaqtincha mehnatga qobiliyatsizlik nafaqasi ish stajining davomiyligidan qat’i nazar ish haqining 100 foizi miqdorida quyidagilarga to‘lanadi:
-ishlayotgan 1941 — 1945-yillardagi urush qatnashchilariga;
-baynalminal jangchilarga va ularga tenglashtirilgan boshqa shaxslarga;
-qaramog‘ida 16 yoshga (o‘quvchilar 18 yoshga) yetmagan uch yoki undan ortiq bolalari bo‘lgan xodimlarga;
-Chernobil AESdagi avariya oqibatlarini tugatishda qatnashgan xodimlarga;
-Chernobil AESdagi avariya natijasida radioaktiv ifloslanish zonasidan evakuatsiya qilingan va ko‘chirilgan, qon hosil qiluvchi organlar kasalliklari (o‘tkir leykoz), qalqonsimon bez (adenoma, rak) va xavfli o‘smalar bilan bog‘liq kasalliklarga chalingan xodimlarga;
-mehnatda mayiblanish va kasb kasalligi natijasida vaqtincha mehnatga qobiliyatsiz bo‘lgan xodimlarga.
Mehnatga qobiliyatsilik nafaqasi, ya’ni “bolnichniy”puli 100% to‘lanadigan xodimlar ro‘yxatida 2 yoshgacha to‘lmagan farzandi borlar yo‘q. Agar 16 yoshgacha to‘lmagan 3 yoki undan ortiq farzandlaringiz bo‘ladigan bo‘lsa, 100% to‘lanadi.
Qolgan xodimlarga vaqtincha mehnatga qobiliyatsizlik bo‘yicha nafaqa quyidagi miqdorlarda to‘lanadi:
a) umumiy ish staji 8 yil va undan ortiq bo‘lgan xodimlarga hamda 21 yoshga yetmagan chin (sag‘ir) yetimlarga ish haqining 80 foizi miqdorida;
b) umumiy ish staji 8 yilgacha bo‘lgan xodimlarga ish haqining 60 foizi miqdorida.
