Xodimning kasallik varaqasini “YAMMT”dan olish mumkinligini bilasizmi?
2024 yil 1 yanvardan boshlab mehnatga layoqatini yo‘qotgan bemor xodimlarga qog‘oz shakldagi kasallik varaqalari berilishi to‘xtatilgani hech kimga sir emas.
Biroq xodimlar ham, “kadroviklar” ham elektron shakldagi mehnatga layoqatsizlik varaqalarini qayerdan yuklab olamiz, degan savollar bilan murojaat etishmoqda.
Hozirgi kunda kasallik varaqasini ortiqcha sansalorlikka yo‘l qo‘ymasdan, yagona milliy mehnat tizimida bor-yo‘g‘i 2 daqiqa vaqt sarflab, xodimning sahifasidan yuklab olish mumkin:
– tizimda xodimning sahifasiga o‘tiladi. Unda “kasallik varaqasi” degan yozuvni ochsangiz, kasallik varaqasi ochtirgan xodimning barcha kasallik varaqalari ro‘yxatini ko‘rish mumkin.
– tegishli kasallik varaqasining satrida “+” belgini bosib, ochilgan oynachada mehnatga layoqatsizlik varaqasi uchun xodimning ma’lumotlarini kiritib, “saqlash” tugmasini bosish kerak.
Ana shundan so‘ng, sizga xodimingizning tayyor shakllangan mehnatga layoqatsizlik varaqasi yuklanadi.
Elektron kasallik varaqasida xodimning ish staji, nafaqani tayinlash uchun foizdagi uning miqdori, nafaqa to‘lanadigan ish kunlari, buxgalteriya bo‘limi tomonidan to‘ldiriladigan satrlar va ustunlar avtomatik shakllanadi.
Elektron mehnatga layoqatsizlik varaqalari xodimlarga ham kadrlar xizmati xodimlariga ham birdek oson va qulay hisoblanadi. Negaki uni yo‘qotib qo‘yib dublikat olish, o‘rindosh xodimlar esa uning nusxasini tasdiqlatib yurishlariga endi hojat qolmadi.
