MЕN YAQINDA BIR TASHKILOTDA YURIST BO‘LIB ISH BOSHLADIM...
SAVOL.
Men bir korxonaga yurist bo‘lib yaqinda ishga kirdim. Majburiy ijro byurosi bo‘limlari tomonidan korxonamizning ayrim xodimlariga qarzdorligi to‘g‘risida, ish haqidan ushlab qolinishi kerakligi aytilib, talabnomalar kelmoqda, ya’ni aliment to‘lovlari, kommunal to‘lovlar bo‘yicha. Bosh hisobchi ham bu borada malakasi yetarli bo‘lmaganligi sababli menga talabnomalarni olib kirib berdi. Bu xolatda nima qilsam bo‘ladi?
JAVOB.
Bunday xolatda siz ushbu Talabnomalarni o‘rganib chiqib, xodimlar bilan ishlash bo‘limiga olib kirib topshirasiz, chunki bu qarzdorlik xolati bilan xodimlar xabardor qilinishi kerak, albatta.
Agarda xodim korxonangizda haqiqatdan ham hozirgi kunda ishlab turgan bo‘lsa, korxona kadrlar bo‘limi tomonidan Mehnat kodeksining 269-moddasi 2-qism, 2-bandiga asosan “Ijro hujjatiga muvofiq xodimning ish haqidan ushlab qolish to‘g‘risida” korxonaning ichki buyrug‘i tayyorlanadi.
Bu buyruqqa Majburiy ijro byurosi bo‘limi tomonidan yuborilgan talabnoma va Mehnat kodeksining 269-moddasi, 2-qism, 2-bandi asos sifatida olinadi.
Keyin esa buyruqning ko‘chirma nusxasi buxgalteriya bo‘limiga beriladi va ushbu buyruq asosida hisobchi xodimning ish haqidan belgilangan tartibda ushlab qolish chorasini ko‘radi.
Bu holatda xodimning roziligi olinmaydi.
Agarda talabnomada ko‘rsatilgan qarzdor xodim, sizning korxonangizda ishlamasa yoki korxonangizda avval ishlab, hozirgi kunda u bilan mehnat shartnomasi bekor qilingan bo‘lsa, buni ham albatta inobatga oling va Majburiy ijro byurosiga bu haqda albatta yozma ma’lumot yuboring.
Misol uchun: “sizning yuborgan talabnomada ko‘rsatilgan xodim bizning korxonada faoliyat yuritmaydi yoki bizning korxonada faoliyat yuritgan, hozirda ushbu xodim bilan tuzilgan mehnat shartnomasi 2024 yilning 12 aprelidan bekor qilingan, buyruq nusxasi ilovada taqdim etiladi” degan mazmunda javob xati yuborib qo‘ying.
