Qisqartirish masalan, davlat organlarida shaxsan vazir yoki qo‘mita raisi kabi rahbarlar vakolatidagi, ya’ni uning buyrug‘i yoki qarori bilan amalga oshiriladigan narsa. Lekin ba’zi vazir yoki qo‘mita raislari muayyan lavozimlarni qisqartirar ekan, unda kimlar ishlayotgani, ularning ijtimoiy holati qandayligiga qiziqmaydi. Bu albatta xato.
Aslida ish beruvchilar qisqartirishlarda homilador va bolasi 3 yoshga to‘lmagan ayollarni (yoki 3 yoshga to‘lmagan bolani yolg‘iz o‘zi tarbiyalayotgan otani) bu vaj bilan ishdan bo‘shatish mumkin emasligini (MK 408-409-moddalar), bola parvarishlash ta’tilidagi xodimning ish joyi saqlanishi shartligi (MK 405-modda)ni e’tiborga olishga majbur.
Lekin aksariyat ish beruvchilar yoki ularning unchalik e’tiborli bo‘lmagan komandasi pastdagi tahlillar bilan, masalan, qaysi lavozimda homilador ayol, qayerda bola parvarishlash ta’tilidagi xodim ishlayapti, bular bilan ishi bo‘lmaydi. Natijada, ular qisqartirish amaliyotlari davrida xatoga yo‘l qo‘yadilar, mehnat qonunchiligini qo‘pol ravishda buzadilar. Xuddi sizdagi vaziyat kabi.
Sizning 2 yoshga to‘lmagan bolangiz borligi sababli va Mehnat kodeksining 405-moddasi (eski MK 234-modda) talablariga asosan bola parvarishlash ta’tilida bo‘lganligingiz sababli, lavozimingiz qisqartirilganligi mutlaqo noqonuniy deb hisoblaymiz. Eski Mehnat kodeksining 98-moddasi, yangi Mehnat kodeksining 156-modadsiga muvofiq mehnat faoliyatingiz qayta tashkil etilgan tuman maktabgacha ta’lim va maktab bo‘limida roziligingizga ko‘ra davom ettirilishi shart edi.
Mazkur holatda aybdorlar Ma’muriy javobgarlik to‘g‘risidagi kodeksning 49-moddasiga muvofiq ma’muriy javobgarlikka tortilishi mumkin. Agar siz joydagi mehnat inspeksiyasiga yoki prokuraturaga murojaat qilsangiz albatta. Bunga to‘laqonli haqlisiz. Bundan tashqari, vaqtni o‘tkazmasdan o‘zingiz yashayotgan fuqarolik sudiga ham da’vo kiritishingiz mumkin. Sud masalaga yakuniy yechib qilib beradigan organ. Davlat bunday da’vo arizalari kiritishda xodimlarni davlat boji to‘lovidan ozod qilgan.
