“DЕKRЕT”DAGI XODIM QAYTYAPTI, MЕNI ISHDAN BO‘SHATGANDA NAFAQA TO‘LASHADIMI?
SAVOL.
Men davlat korxonasiga ta’tildagi kishining joyiga chiqib yetti oy ishladim, ta’tildagi xodim ishga chiqdi. Men yana ishsiz qoldim, shu ishlagan korxonam ish topib ishga joylashganimga qadar konpensatsiya tulaydimi?
JAVOB.
Siz boshqa bir xodimning ta’tilda bo‘lgan vaqtiga ishga olindim deyapsiz, demak, bola parvarishlash ta’tilida bo‘lgan xodimning o‘rniga muddatli asosda ishga olingansiz, to‘g‘rimi?
Ta’tilda bo‘lgan xodim o‘z ishiga qaytadigan bo‘lsa, uning o‘rnida muddatli asosda ishlab kelgan xodim (ya’ni siz) bilan tuzilgan mehnat shartnomasi MK 158-moddasiga asosan bekor qilinadi.
Mehnat kodeksining 100-moddasida ishdan bo‘shatilganidan keyingi ish qidirish davrida o‘rtacha oylik ish haqi to‘lanadigan, 173-moddasida esa ishdan bo‘shatish davrida ishdan bo‘shatish nafaqasi to‘lanadigan holatlar birma-bir ko‘rsatib o‘tilgan.
Bu ikki moddadagi ro‘yhatda mehnat shartnomasini uning muddati tugaganligi munosabati bilan, MK 158-moddaga asosan bekor qilish holati ko‘rsatilmagan.
Shu sababli, muddatli mehnat shartnomangizni ta’tildagi xodim qaytishi munosabati bilan MK 158-moddaga asosan bekor qilishda sizga ish qidirish davri uchun o‘rtacha ish haqi ham, ishdan bo‘shatish nafaqasi ham to‘lanmaydi.
Biroq, barcha holatlar kabi ishdan bo‘shashingiz munosabati bilan sizga “raschetniy”, ya’ni 7 oylik davrga to‘g‘ri keladigan, biroq foydalanilmagan mehnat ta’tilingiz uchun kompensatsiya hamda qilgan mehnatingiz uchun oxirigacha olinmagan ish haqi to‘lovlari to‘lab beriladi (MK 172-modda).
