ONAMNI ASRA HAYOT
Ey hayot, bunchalar chigalsan nega?
Har ishning javobi bordir ertaga.
"Qancha toshing bo‘lsa, mana menga ot",
Onamsiz men uchun bir pulsan hayot!
Zahringni yomonga sochaqolgin bor,
Sen shunchalar pastsan, shunchalar beor.
Allohim yaratgan eng buyuk ijod
U mening onamdir bilib qo‘y hayot!
Onamni yig‘latma, asra, avayla,
Olamda onani jannat deb sayla.
Ularni yonida bo‘lib tur najot,
Dunyoning shodligin ulashgin hayot.
Baxtdan yarqiragan peshonangni tut,
Onamning yonidan ta’zim qilib o‘t,
Dardingni ho‘v ana yomonlarga sot,
Farishta onamga kulib boq, hayot.
Boshidan uchirma aziz ro‘molin,
O‘ziga sezdirma yolg‘izlik holin.
Madad bo‘l onamga, ham sabru sabot,
Shunda seni hurmat qilaman hayot.
Onam qayda bo‘lsa, doim bolam der,
Azoblaring bo‘lsa, mana menga ber.
Onam azob cheksa chidolmasman rost,
Onamsiz dunyoying kerakmas hayot!
Yomon bo‘lsang bizga, sendan nima naf,
Men doim ezgulik, yaxshilik taraf.
Onamsiz nursizsan, go‘yo zulumot,
"Sen onam bor uchun go‘zalsan Hayot!
