CHQBT fani o‘qituvchilariga ustama bersa bo‘ladimi?
@Yurist_Xizmati 4558-savol:
Umumiy o‘rta ta’lim maktabi Chaqiriqqacha harbiy tayyorgarlik fani o‘qituvchisiga ustama bersa bo‘ladimi?
YURIST JAVOBI:
✅ Ha CHQBT o‘qituvchiga ustama berish mumkin.
Vazirlar Mahkamasining 2019 yil 30 sentyabrdagi 823-son qarori bilan tasdiqlangan “Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida”nizomning 20-bandiga ko‘ra pedagog xodimlarining bazaviy tarif stavkalariga har oylik ustamalar:
• tarbiyaviy jarayonning amalga oshirilish sifati va samaradorligiga;
• sinfdan tashqari ishlarga hamda o‘quvchilarni insonparvarlik va mehr-oqibat ruhida tarbiyalashga;
• tegishli sinflar va o‘quv fanlari uchun tasdiqlangan umumiy o‘rta ta’limning davlat ta’lim standartlarida nazarda tutilgan bilimlar va ko‘nikmalar to‘liq hajmining o‘quvchilar tomonidan o‘zlashtirib olinishi darajasiga;
• o‘quv jarayoniga qo‘shilgan aniq hissa, o‘qitishning yuqori samaradorligi va sifati uchun 40 foizgacha miqdorda belgilanadi.
Nizomning 21 – bandiga ko‘ra umumta’lim muassasalari pedagog xodimlarining bazaviy tarif stavkalariga Jamg‘arma hisobidan har oylik ustamalar yangi o‘quv yili uchun o‘tgan o‘quv yili yakunlari bo‘yicha belgilanadi.
♂️ Bu qoida maktabdagi barcha o‘qituvchilarga nisbatan tatbiq etiladi.
Nizomning 27-bandiga ko‘ra umumta’lim muassasasining rahbar xodimlariga (direktor, direktorning o‘quv ishlari hamda ma’naviy-ma’rifiy ishlar bo‘yicha o‘rinbosarlari) va o‘z faoliyatini soatbay haq to‘lash asosida amalga oshiradigan o‘qituvchilariga mazkur har oylik ustamalar belgilanmaydi.
✅ Shunday ekan CHQBT o‘qituvchisi bemalol ustamaga da’vogarlik qilishi mumkin.
