Shakarli ichimliklar yuqumli bo‘lmagan kasalliklar rivojlanish xavfini oshiradi
Jahon sog‘liqni saqlash tashkilotining ma’lumotlariga ko‘ra, har yili dunyo bo‘ylab 8 milliondan ortiq odam noto‘g‘ri ovqatlanish bilan bog‘liq sabablarga ko‘ra vafot etadi.
Inson salomatligiga jiddiy ta’sir ko‘rsatadigan mahsulotlar orasida turli gazlangan shirin ichimliklar, ayniqsa, yoshlar o‘rtasida tobora ommalashib bormoqda. Ularning zarari yosh organizmda darrov sezilmasligi mumkin, ammo vaqt o‘tib, bunday ichimliklarni muntazam ravishda iste’mol qilishning oqibatlari ayanchli bo‘lishi mumkin...
Shirin, ya’ni tarkibida shakar, shirinlantiruvchi yoki shakar o‘rnini bosuvchi moddalar mavjud bo‘lgan ichimliklarni iste’mol qilish kaloriyalarning ko‘payishi, ortiqcha vazn, semizlikni keltirib chiqarishi mumkin.
Buning oqibatida esa qandli diabet, yurak-qon tomir kasalliklari va boshqa yuqumli bo‘lmagan xastaliklar rivojlanish xavfi ortadi.
Tadqiqotlar shuni ko‘rsatadiki, tarkibida shakar bo‘lgan va shakar bo‘lmagan shirin ichimliklarni iste’mol qilish kuniga 250 millilitrga ko‘payishi semizlik rivojlanish ehtimolini mos ravishda 12 foiz va 21 foizga, qandli diabet 2 turini 19 foiz va 15 foizga, arterial gipertoniyani 10 foiz va 8 foizga va barcha sababdan o‘limni 4 foiz va 6 foizga oshiradi.
Xususan, shakarli ichimliklarni ko‘p iste’mol qiladigan bolalarda uni kam iste’mol qiladigan bolalarga nisbatan ortiqcha vazn yoki semirish ehtimoli yuqoriroq bo‘ladi.
Shuningdek, shakarga boy ichimliklar va oziq-ovqatlar odamlar, ayniqsa, bolalar, o‘smirlar va yoshlar ratsionida ortiqcha kaloriyalarning asosiy manbai bo‘lishi mumkin.
