MЕN SUDLANGANMAN RAXBARLIK LAVOZIMIDA ISHLASHIM MUMKINMI?
Assalomu alaykum men 2022 yil 28-sentyabr kuni Sudning xukmi bilan JK-210 moddasi 1-kismi bilan aybdor deb topilib JK-45 moddasi bilan 1 yilga davlat organlarida mansabdorlik lavozimida ishlash xukukidan maxrum kilgan xolda 2 yil muddatga ozodliklikdan maxrum kilinganman. Bugungi kunda jazo muddatini utab chikdim. Savolim kuyidagicha men xozirgi kunda musika maktablarda, va shunga uxshash joylarda raxbarlik lavozimida ishlay olamanmi, keyin sudlanganlik xolatini kaysi vaktda oldirib tashlasam buladi
JAVOB:
Jinoyat kodeksining 77-moddasiga asosan sudlanganlik shaxsning sodir etgan jinoyati uchun hukm etilganligidan kelib chiqadigan huquqiy holatdir. Jazo tayinlangan ayblov hukmi qonuniy kuchga kirgan kundan boshlab shaxs sudlangan deb hisoblanadi. Sud tomonidan jazodan ozod qilingan shaxs sudlanmagan deb hisoblanadi. Sudlanganlik muddatining o‘tib ketganligi yoki sudlanganlikning olib tashlanishi munosabati bilan uning barcha huquqiy oqibatlari bekor bo‘ladi.
Jinoyat kodeksining 78-moddasida sudlanganlik holatining tugallanishi belgilab qo‘yilgangan bo‘lib mazkur moddaning birinchi qismi v) bandiga asosan muayyan huquqdan mahrum qilish yoki axloq tuzatish ishlari jazolari o‘talganidan keyin bir yil o‘tgach tugatilishi belgilangan.
Ya’ni, sizning sudlanganlik holatingiz sizga muayyan huquqdan mahrum qilish jazosi qo‘llanilib, uni o‘taganingizdan keyin 1 yildan so‘ng olib tashlanadi. Sizga muayyan huqukdan mahrum qilish jazosi 2022-yilning sentyabr oyida qo‘llanilgan. Siz uni qaysi yil va oyda o‘tab bo‘lgan bo‘lsangiz, shundan 1 yil o‘tib sudlanganlik holati olib tashlanadi.
Xususan, O‘zbekiston Respublikasi Oliy sudi Plenumining 2015-yil 18-sentyabrdagi 13-sonli “Sudlanganlik holati tugallanishi va olib tashlanishiga oid qonunchilikni qo‘llash bo‘yicha sud amaliyoti to‘g‘risida”gi qarori 4-bandiga asosan Sudlanganlik holati tugallanishi shaxsning sudlanganligi fakti bilan bog‘liq barcha oqibatlarning jazo turi va muddatidan kelib chiqqan holda Jinoyat kodeksi 78-moddasida nazarda tutilgan muddatlar o‘tganligi natijasida avtomatik tarzda (o‘z-o‘zidan) barham topishini anglatadi.
Bunday hollarda sudlanganligi tugallangan shaxs, uning vorisi, qonuniy vakili yoki advokati iltimosiga ko‘ra mahkumning yashash joyidagi sud tomonidan sudlanganlik holati mavjud emasligi faktini tasdiqlovchi ma’lumotnoma beriladi. Buning uchun manfaatdor shaxs tomonidan sudga taqdim etilgan ichki ishlar organlari axborot markazi ma’lumotnomasi va jazo o‘talganligi (ijro etilganligi) faktini tasdiqlovchi hujjatlar asos bo‘ladi.
Bu holatda siz muayyan huquqdan mahrum qilish jazosini o‘tab bo‘lganingizga 1 yil to‘lganidan so‘ng ichki ishlar organlari axborot markazi ma’lumotnomasi va jazo o‘talganligi (ijro etilganligi) faktini tasdiqlovchi hujjatlarni jazoni qo‘llagan jinoyat sudiga topshirsangiz, sizga sudlanganlik holati mavjud emasligi faktini tasdiqlovchi ma’lumotnoma beriladi.
