Assalomu aleykum! Sizlardan huquqiy yordam so‘ramoqchi edim. Turkiya fuqarosi O‘zbekistonda yashovchi qizga uylanmoqchi bo‘lsa, qanday yo‘l tutadi? Ya’ni rasmiy nikohdan o‘tishi uchun qayerga murojaat qilishlari kerak? Ariza bergandan keyin qancha muddat kutiladi? Iltimos, batafsil ma’lumot bering! Javob uchun oldindan raxmat!
YURIST JAVOBI:
Oila kodeksining 234-moddasiga asosan O‘zbekiston Respublikasida doimiy yashab turgan chet el fuqarolari va fuqaroligi bo‘lmagan shaxslar uning hududida oilaviy munosabatlarda O‘zbekiston Respublikasi fuqarolari bilan teng huquqlardan foydalanadilar va teng majburiyatlarga ega bo‘ladilar.
Endi qarang! Vazirlar Mahkamasining 2023-yil 20-oktabrdagi 550-son qaroriga 3-ilovada tasdiqlangan Fuqarolik holati dalolatnomalarini qayd etish Qoidalari 89-bandiga asosan O‘zbekiston fuqarosi va chet el fuqarosi yoki fuqaroligi bo‘lmagan shaxslar o‘rtasidagi nikohni qayd etish agar chet el fuqarosining yoki fuqaroligi bo‘lmagan shaxsning O‘zbekiston Respublikasida bo‘lish vizasi nikoh tuziladigan kunda haqiqiy bo‘lsagina amalga oshiriladi.
✅ Shunga ko‘ra sizdagi holatda ham Turkiya fuqarosining vizasi o‘z kuchida bo‘lsa, unda nikohni qayd etish mumkin.
Bunda chet el fuqarosi yoki fuqaroligi bo‘lmagan shaxsning nikohga kirish haqidagi arizasiga:
➖ uning shaxsini tasdiqlovchi hujjat nusxasi;
➖ chet el fuqarosi yoki fuqaroligi bo‘lmagan shaxsning nikohda turmasligi haqidagi belgilangan tartibda legalizatsiya qilingan yoki apostil qo‘yilgan hujjat (davlat tiliga tarjimasi bilan birga) ilova qilinishi lozim.
