KADR XORIJGA CHIQISH PASPORTIMNI HAM SO‘RAYAPTI
SAVOL.
Assalomu alaykum Saidali aka, tijorat bankida ishliman, savolim shuki Xodimlar bilan ishlash bulimi tomonidan xorijga chikish pasportini olib kelib ularga topshirishni talab kilishmokda, bu xolat kanchalik tugri , xorijga chikish pasporti fukaroning shaxsiy xujjatiku , bankka alokasi yuk...
JAVOB.
Amaldagi Mehnat kodeksi 124-moddasiga muvofiq, xodim ishga kirayotganda ish beruvchiga o‘zining pasportini yoki uning o‘rnini bosuvchi hujjatni yoxud identifikatsiyalovchi ID-kartani, o‘n olti yoshgacha bo‘lgan shaxslar esa tug‘ilganlik to‘g‘risidagi guvohnomani yoki identifikatsiyalovchi ID-kartani taqdim etadi.
Bunda moddadagi "pasportni yoki uning o‘rnini bosuvchi boshqa hujjatni" degan jumla O‘zbekiston fuqarosinng biometrik pasportini ham, xorijga chiqish pasportini ham nazarda tutadi, ya’ni har ikkalasidan birini ish beruvchiga taqdim etsa bo‘laveradi.
⚠️ Ahamiyat beraylik, yuqoridagi moddada nazarda tutilgan hujjat turlari ish beruvchiga taqdim etiladi, unga topshirilmaydi, ya’ni ish beruvchi bu sanab o‘tilgan hujjatlar xodimda mavjudligiga ishonch hosil qilib, agar xohlasa ulardan nusxa olib, keyin hujjatlarning asl nusxalarini yana xodimga qaytarishi shart hisoblanadi.
Lekin savoldagi holatda xodimlarga nisbatan ularning xorijga chiqish pasportini kadrlar bo‘limiga topshirishni talab qilishmoqda ekan. Bunda savoldan tushunish mumkinki, bu xodimlarning bu hujjatini bank o‘zida saqlab turishini talab qilmoqda. Bu mutlaqo noto‘g‘ri, chunki yuqorida buni izohlaganimizdek, ish beruvchida fuqaroning shaxsni tasdiqlovchi hujjatini o‘zida saqlab turishga huquqi yo‘q.
❗️Qolaversa, bu mehnat qonunchiligini buzish hisoblanadi hamda ana shu bank mansabdor shaxslariga nisbatan Ma’muriy javobgarlik to‘g‘risidagi kodeksning 49-moddasiga muvofiq, mansabdor shaxs 3 400 000 so‘mgacha jarimaga tortilishi, shuningdek, fuqarodan uning pasportini qonunga xilof ravishda olib qo‘yish yoki garovga olib qo‘yganlik uchun ushbu kodeksning 223*3-moddasiga muvofiq 5 100 000 so‘mgacha jarima jazosi begilangan.
