AYOLLARGA FOYDALI MASLAHAT
— Qayerda bo‘lishingizdan qat’i nazar, Alloh taolo sizni ko‘rib, eshitib turganini unutmang!
— Doimo shariatimiz buyurganidek kiyining!
— Libosingiz sizning chin muslima ekaningizni aytib tursin!
— Pardozingiz tahorat bo‘lsin! Tilingizdan Alloh taoloning zikri tushmasin!
— Qur’oni Karimni o‘qishni, oyatlar ma’nosi borasida tafakkur, tadabbur qilishni doimiy odat qilib oling!
— Namoz vaqti bo‘lganda, har qanday ishingizni tashlab, namozni ado eting!
— Namozda aslo shoshilmang! Qiroatni tajvid bilan o‘qib, ruku, sajdalarini o‘rniga qo‘yib, namozni ado eting!
— Ali Tantoviy ismli olimning mana bu gaplarini yodingizda tuting: «Agar namozda shoshilsang, yodingda tutki, sen qo‘lga kiritishni istayotgan va yo‘qotishdan qo‘rqayotgan narsalarning barchasi sen huzurida turgan Zotning qo‘lidadir».
— Zinadan chiqmoqchi bo‘lganingizda ortingizdan erkak kishi ham chiqadigan bo‘lsa, siz chetga o‘tib, kutib turing, erkak chiqib ketsin, keyin siz chiqing.
— Liftga chiqmoqchi bo‘lganingizda u yerda begona erkak bo‘lsa, chiqmang. Kutib turing. Lift o‘sha odamni manziliga olib chiqqach, keyin liftni chaqiring.
— Amakingiz, ammangiz, tog‘angiz, xolangizning o‘g‘illari bilan hech qachon qo‘l berib ko‘rishmang, chunki ular sizga nomahramdir.
— Sizga mahram qarindoshlar bo‘lsa ham, muomalada chegarani biling, viqoringizni, iffatingizni saqlang.
— Dugonalaringiz bilan ko‘chada ketayotganingizda qah-qaha otib kulishib, baland ovozda gaplashmang. Hayoli bo‘ling va ko‘chada yurish odobiga rioya qiling!
— Siz o‘tirgan uyga yoshi katta qarindoshlar kirsa, ularni hurmat qilib o‘rningizdan turing!
— Ko‘chada ketayotganingizda, yoningizda otangizmi, akangizmi bo‘lmasa, birorta begona erkak bilan, hatto u nomahram qarindosh bo‘lsa ham, gaplashmang, u bilan aslo yolg‘iz qolmang. Dinimiz bizni bundan qaytargan.
— Jamoat joyida ketayotganingizda yerda yotgan non bo‘lagini ko‘rib qolsangiz, uni olish uchun engashmang, balki nonning yonida to‘xtab, o‘tirib, keyin oling.
— Avtobusda, taksida yurishingizga to‘g‘ri kelib qolsa, yoningizdagi yo‘lovchiga aslo hayotingiz haqida hikoya qilmang. Ovozingizni baland ko‘tarmang.
Alloh taolo qiz boqayotgan, qizlarini uzatish arafasida turgan va qizlarini uzatgan azizlarimizni mehribon, nasihatchi, haqni ko‘rsatuvchi ota-ona bo‘lishlarini nasib etsin! Qiyomat kuni barcha muslima qizlar o‘z ota-onalari uchun do‘zaxdan parda bo‘lishlarini nasib aylasin!
Alloh taolo o‘g‘il boqayotgan, o‘g‘lini uylantirish arafasida turgan va uylantirgan azizlarimizni mehribon, ibratli, haqni ko‘rsatuvchi, nasithatgo‘y ota-ona bo‘lishlarini nasib etsin! Qiyomat kuni barcha musulmon yigitlar o‘z ota-onalarining boshlariga izzat toji, ustlariga karomat sarposi kiydirilishiga sababchi bo‘lishlarini nasib aylasin
