XONALAR UCHUN PARDA TANLASH
Xonadonning fayzli, o‘ziga xos dizaynli bo‘lishida pardalar tanlovi juda muhim. Deraza uchun tanlangan pardalar badiiy bezaklardan tashqari, yana qanday vazifalarni bajarishi kerakligi haqida o‘ylab ko‘rganmisiz? Aytaylik uy ichidagi manzarani yashirish va harir parda yordamida tashqarini kuzatishi mumkin. Hatto mutaxassislar shunday pardalarni yaratishganki, ular xonani quyosh nuri va yorug‘likdan butkul to‘sadi. Shu o‘rinda savol tug‘iladi: xonadoningizga mos pardalarni tanlashda nimalarga e’tibor berish lozim?
Uzuni ma’qulmi yoki kaltasi? Odatda yosh bolali ayollar uzunligi deraza tokchasidan bo‘lishini hohlaydilar, ularning fikricha uzun pardalar tez ifloslanadi. Hatto bolalar ularni o‘ynab, uzib olishlari ham mumkin. Lekin uzunligi deraza tokchasigacha bo‘lgan pardalar faqat oshxona va oynabandli ayvon derazalariga mos tushadi. Qolgan xonadonga esa uzun parda tanlashni maslahat beramiz. Ko‘p qavatli uylarda balkon derazasi va eshigi bir-biriga yaqin joylashgan bo‘ladi. Bunday deraza pardasi tokchagacha, eshikniki esa polgacha uzunlikda bo‘lsa, xona o‘zgacha ko‘rinishga ega bo‘ladi.
Bolalar xonasi uchun. Havorang, kulrang va binafsharang pardalar farzandingizning uyqusi buzilmay, miriqib uxlashini ta’minlaydi. Shu bois iloji boricha bolalar xonasi uchun aynan shu ranglilarini ixtiyor etavering.
Mebellaringizga hamohang bo‘lsin. Bu borada ranglar uyg‘unligi yoddan ko‘tarilmasligi lozim. Tanlayotgan pardalar xona devorlarining rangi bilan emas, balki mebel rangiga mos tushsa, maqsadga muvofiq bo‘ladi. Albatta, devor rangiga mos tushgan pardalar ham xonaga o‘ziga hos shinamlik beradi. Biroq keying yillar davomida devorlar rangini o‘zgartirish yoki ularga gulqog‘oz yopishtirish istagida bo‘lsangiz, pardalarni ham o‘zgartirshingizga to‘g‘ri keladi. Shu sababli pardalarni mebellarga moslab tanlaganingiz ma’qul.
Agar jalyuzidan foydalansangiz. Jalyuzi shifti baland uylarga ilingani ma’qul, uning vertikal va gorizontal turlari mavjud. Vertikal jalyuzilarni har qanday xona (yoki oshxona)ga o‘rnatishingiz mumkin. Gorizontali esa ofislarga ilingani ma’qul.
Pardalarni tozalab turing! Pardada to‘planib qolgan changni tozalash oson ish emas. Ularni dam-badam yuvish esa sifatiga aks ta’sir etishi mumkin. Shu sababli vaqti-vaqti bilan parda yuzasiga to‘planib qolgan changni tozalab turish kerak. Buning uchun changyutgich og‘ziga doka tutib, pardaga tekkizmagan holda changni tozalaysiz. Yuvilgan pardalarni esa biroz namligida dazmollagan ma’qul. Shunda ular oson tekkislanadi.
