Qisqarishga tushgan xodimga boshqa ish taklif qilindi, lekin rad etayabdi. Nima qilsak bo‘ladi?
Yangi tahrirdagi Mehnat kodeksining 161-moddasi ikkinchi qismi ikkinchi bandiga asosan ish beruvchi texnologiyaning, ishlab chiqarish va mehnatni tashkil etishning o‘zgarishi, ishlar (mahsulot, xizmatlar) hajmining qisqarishi bilan bog‘liq bo‘lgan tashkilot (uning alohida bo‘linmasi), yakka tartibdagi tadbirkor xodimlari sonining yoki shtatining o‘zgarganligi munosabati bilan xodim bilan tuzilgan mehnat shartnomasini bekor qilishga haqli.
❗️Biroq jamoa shartnomada kasaba uyushmasining roziligini olish talab etilgan bo‘lsa, unda MK 164-moddasiga asosan kasaba uyushmasining rozilini olish talab etiladi.
Sizdagi holatda yuqoridagi qoidalarga ko‘ra xodimni ishdan bo‘shatishga kasaba uyushmasi rozilik bermagan va xodimga boshqa ish taklif etilgan. Lekin xodim taklif etilgan ishga rad javobi bergan.
Bunday holatda xodim bilan tuzilgan mehnat shartnomasi quyidagi tartibda bekor qilinadi. Mehnat kodeksining 144-moddasi birinchi va ikkinchi qismlari mazmuniga ko‘ra qisqartirish kelganda ish beruvchi xodimga boshqa ishni taklif qilishi shart. Siz bu majburiyatni bajargansiz.
Endi qarang! Mehnat shartnomasi:
xodim ish beruvchi taklif etgan boshqa ishga o‘tishni rad etganda;
ish beruvchida bo‘sh (vakant) o‘rinlar yoki xodim sog‘lig‘i holati bo‘yicha qarshi ko‘rsatma bo‘lmagan ish mavjud bo‘lmaganda;
xodim ushbu ishni bajarish uchun zarur bo‘lgan malaka talablariga muvofiq emasligi sababli uni boshqa ishga o‘tkazish mumkin bo‘lmaganda bekor qilinishi MK 144-moddaning yettinchi qismida qayd etilgan.
✅ Aynan shu qoidaga ko‘ra siz xodim bilan tuzilgan mehnat shartnomasini bekor qilishingiz mumkin.
❗️Mazkur jarayonni rasmiylashtirishda buyruqqa asos sifatida qisqartirishning asosini, xodimga boshqa ish taklif etilganligi va u bu taklifni rad etganligi haqida dalolatnomani hamda MK 144-moddasi keltiriladi. Bu jarayonda kasaba uyushmasining roziligi olinmaydi.
