Suyukli ayol bo‘lishingiz uchun maslahatlar
Tinglang va itoat eting. Eriga itoat etish – farz. Sizning umr yo‘ldoshingiz – oila boshlig‘i. Unga ana shu tuyg‘uni his etish imkonini bering. Shunda hurmat qozonasiz.
Biror joyga borsangiz, albatta eringizdan ruxsat so‘rang. Iznsiz ostona xatlab ko‘chaga chiqa ko‘rmang. Chunki eringiz sizga javobgar.
Eringiz uchun jozibali bo‘ling. Alloh taolo barcha ayollarni erlari uchun pardoz-andoz qilishga, doim go‘zal, pokiza, orasta bo‘lib yurishga buyurgan. Alloh amr etganidek, eringiz yuragini zabt etish uchun chiroyingizni ishga soling. Begonalarning emas, turmush o'rtog'ingizning e’tiborini tortishga harakat qiling!
Yaxshi kayfiyat bilan qarshi oling. Tasavvur qiling: eringiz ishdan qaytdi. Qarshisida saranjom-sarishta uy, shirin kalom, yaxshi kayfiyat bilan kulib qarshi olgan go‘zal ayoli, sevib iste’mol qiladigan mazali taomlar, aqlli farzandlar. Shunda ham eringizda salbiy munosabat kuzatilarmikan?!
Oilasi uchun qilayotgan barcha ezgu harakatlari, mehnatlari uchun minnatdorchilik bildirib turing. Jannatiy ayolning bezagi erini doimiy qo‘llab-quvvatlash, oilasi farovonligi uchun qilayotgan ishlariga ijobiy baho berish, rahmat aytishdir. Zero, erining topganiga qanoat qilish, unga minnatdorchilik bildirish ayolning saodat kalitidir.
Oilaviy sirlarni, jinsiy hayot bilan bog‘liq ishlarni zinhor ko‘chaga olib chiqmang. Bunday gaplar er-xotin o‘rtasida qolsin. Bu oila mustahkamligida juda muhim sanaladi.
Bahs paytida, aybingiz bo‘lmasa-da, “Kechiring”, “Uzr” deyishni lozim tuting.
“Jannat kaliti” bo‘lgan eringiz ko‘nglini olishga doim harakat qiling. Nikohingiz mustahkam, oilaviy munosabatlaringiz yaxshi bo‘lishini Allohdan so‘rang.
