Poytaxt havosini yaxshilashga oid Prezident qarori loyihasi e’lon qilindi.
Muhokamalar portaliga “Toshkent shahri va uning atrofidagi issiqxonalar va sanoat korxonalari tomonidan atmosferaga chiqarilayotgan tutun va zaharli gazlarni keskin kamaytirish chora-tadbirlari to‘g‘risida”gi Prezident qarori loyihasi joylashtirildi.
Bu qaror loyihasi bilan poytaxt va uning atrofidagi tobora zararlanib borayotgan atmosfera havosi va ekologik vaziyatni yaxshilash borasida bir qator tadbirlar ko‘zda tutilyapti.
E’tibor asosan, poytaxt va uning atrofidagi issiqxonalar va sanoat korxonalariga hamda ulardagi faoliyatning ekologik talablarga qanchalik rioya etilishiga qaratilmoqda.
Bu yerdagi issiqxona va sanoat korxonalari tomonidan yoqilg‘i yoqish hisobiga havoga chiqarilayotgan tutun va zaharli gazlarni kamaytirishga qaratilgan “Yo‘l xaritasi” ham taklif etilmoqda.
Bundan tashqari loyiha bilan:
issiqxonalar, sanoat korxonalari, qurilish materiallari ishlab chiqarish zavodlari tomonidan ish faoliyati davomida atmosfera havosi muhofaza qilish talablarini buzish, shuningdek, atmosfera havosini me’yoridan ortiq darajada ifloslantirish, taqiqlangan yonuvchi mahsulotlardan foydalanish, ifloslantiruvchi moddalarni tozalovchi uskunalarni o‘rnatmasdan atmosferaga tashlaganligi uchun BHMning 100 baravari miqdorida moliyaviy jarimalar qo‘llash;
xavflilik darajasi I va II toifalarga mansub qurilish materiallari ishlab chiqaruvchi korxonalarning chang-gaz tutish uskunalarining tashlamalarni ushlash samaradorlik darajasi yangi ishab chiqarish quvvatlarida 99,5 foizdan, amaldagi ishlab chiqarish quvvatlarida 95,0 foizdan past bo‘lgan taqdirda, ularga nisbatan Ekologiya, atrof-muhitni muhofaza qilish va iqlim o‘zgarishi vazirligi tomonidan tegishli choralar ko‘rish ham ilgari surilmoqda.
Hullas, men bu qaror loyihasidan tushundimki, yaqin oylarda Toshkent shahri va uning atrofida joylashgan issiqxonalar va atmosferaga zararli tashlanmalar chiqaradigan sanoat korxonalarining faoliyati ekologik talablarga rioya etilishi yuzasidan jiddiy nazoratga olinishi mumkin.
Ekologik talablarga javob bermaydiganlarining faoliyati xatto to‘xtatilishi ham mumkin.
