Boshqa maktabga ishga o‘tdim, ta’til puli qanday hisoblanadi?
@Yurist_Xizmati 4524-savol:
Men 2023-2024 o‘quv yili sentyabr oyda boshqa maktabga ishga o‘tdim.Bu yilgi mehnat tatilga menga 36 xaftaga xaq to‘lanadimi yoki 48 kungami? YANGI mexnat qonuniga ko‘ra o‘zgarishlar bormi?
YURIST JAVOBI:
✅ Pedagog xodimlarga nisbatan uzaytirilgan mehnat ta’tillari beriladi.
Mehnat kodeksining 216-moddasiga ko‘ra mehnat ta’tillari asosiy hamda qo‘shimcha mehnat ta’tillariga bo‘ladi. Bunda har yilgi asosiy eng kam mehnat ta’tilining davomiyligi yigirma bir kalendar kunni tashkil etadi (MK 217-m).
❗️Ushbu kodeks 218 hamda 501-moddalariga muvofiq pedagoglarga uzaytirilgan mehnat ta’tili beriladi.
Vazirlar Mahkamasining 2023 yil 26 iyundagi 263-son qaroriga ilovada tasdiqlangan Pedagog xodimlar uchun yillik uzaytirilgan mehnat ta’tili davomiyligi me’yorlarida umumiy turdagi davlat maktabgacha ta’lim tashkilotlarining O‘qituvchi, o‘qituvchi-logoped, o‘qituvchi-defektologi uchun 56 kalendar kunidan iborat uzaytirilgan mehnat ta’tili beriladi.
✅ Shu qoidaga ko‘ra siz mehnat ta’tilini to‘liq 56 kalendar kuniga olasiz. Lekin ishga kirganingizga 12 oy to‘lmagani sababli ta’til puli kamroq chiqadi. Bunda siz sentabr oyida ishga kirganingiz uchun ta’til puli 9 oy uchun hisoblab chiqariladi.
Mehnat kodeksining 233-moddasida har yilgi mehnat ta’tilida bo‘lgan vaqti uchun xodimga ushbu Kodeksning 257-moddasiga muvofiq hisoblab chiqariladigan o‘rtacha ish haqining saqlanishi kafolatlanishi belgilangan.
Bunda o‘rtacha ish haqi u hisoblanadigan oydan oldingi o‘n ikki oyni tashkil etuvchi hisob-kitob davri yoxud agar xodim o‘n ikki oydan kam ishlagan bo‘lsa, amalda ishlangan davr uchun xodimga hisoblangan ish haqidan kelib chiqqan holda belgilanadi (MK 257-m 1-qism).
☝️Shu qoidaga ko‘ra xodimning o‘rtacha oylik ish haqini hisoblashda u 12 oydan ortiq ishlagan bo‘lsa, uning ta’tilga chiqishdan oldingi 12 oylik davrda korxonadan olgan barcha to‘lovlari (ish haqi, moddiy yordam, mukofot puli va boshqalar) qo‘shilgan holda 12ga bo‘linadi.
Xulosa qiladigan bo‘lsak, sizga ta’tilga chiqishingizdan oldingi 9 oylik davrda to‘langan barcha to‘lovlar qo‘shilgan holda ularni 9ga bo‘lish orqali o‘rtacha oylik ish haqingiz hisoblanadi va shu miqdordan kelib chiqib sizga ta’til puli to‘lanadi.
