BIZ O‘Z UYIMIZGA KADASTR XUJJATINI RAMIYLASHTIRA OLMAYAPMIZ
Fuqaro murojaati: 2019 - yil shahar xokimi tomonidan buzilgan inshoat o‘rniga yakka tartibda uy-joy qurish uchun yer ajratilgan. Shu yerga uy qurib 2020-yil kadastr qilganman. Yaqinda kadastr xodimlari kelib qolgan qurilishingizni ham kadastr qilishimiz kerak dedi va o‘lchovlarni olib ketti. Uch kundan keyin arizangiz rad etildi degan sms keldi. Telefon qilib so‘rasam yer ajratilganlik to‘g‘risidagi hokim qarori bekor bo‘lgan deb javob berdi.
JAVOB:
"Ma’muriy tartib-taomillar to‘g‘risida"gi qonunning 55-moddasiga asosan Ma’muriy hujjat adresat tegishli tarzda xabardor qilingan paytdan e’tiboran kuchga kiradi. Mazkur qonunning 33-moddasiga asosan Xabarnomani topshirilganligi ma’lum qilinadigan buyurtma xat orqali yuborish yoki tilxat olib topshirish yoxud xabardor qilinganligi fakti qayd etilishini ta’minlaydigan axborot tizimlaridan foydalangan holda xabardor qilish ma’muriy ish yuritishda tegishli tarzda xabardor qilish hisoblanadi. Tegishli xabarnoma manfaatdor shaxs tomonidan olingan payt xabardor qilish vaqtidir.
Mazkur asolarga ko‘ra siz, hokim qarori bekor bo‘lgani haqida ma’muriy organ tomonidan ogohlantirilishingiz lozim edi.
Bundan tashqari mazkur holatda "Ma’muriy tartib-taomillar to‘g‘risida"gi qonunning muhim prinsiplaridan biri Tinglanish imkoniyatining mavjudligi ham buzilgan. Unga ko‘ra, Ma’muriy organ manfaatdor shaxsga ma’muriy hujjatni qabul qilish uchun ahamiyatga ega bo‘lgan barcha holatlar yuzasidan o‘z fikrini bildirish imkoniyatini berishi shart. Biroq, mazkur holatda manfaatdor shaxsga bunday imkoniyat yaratilmagan
Tavsiya: Mazkur holatda siz sizga chiqarilgan yer ajratish to‘g‘risidagi qarorni bekor bo‘lishiga asos bo‘lgan hokim qarorini topib uni haqiyqiy emas deb topish yuzasidan ma’muriy sudga ariza bilan murojaat qilishingiz lozim.
