ODAM URIB YUBORDIM.
QAMALAMANMI?
Jinoyat kodeksining 266-moddasi birinchi qismiga ko‘ra transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish badanga o‘rtacha og‘ir yoki og‘ir shikast yetkazilishiga sabab bo‘lsa, — bazaviy hisoblash miqdorining ellik baravarigacha miqdorda jarima yoki uch yuz oltmish soatgacha majburiy jamoat ishlari yoxud uch yilgacha axloq tuzatish ishlari bilan jazolanadi.
Mazkur moddaning 2-qismiga ko‘ra o‘sha qilmish odam o‘lishiga sabab bo‘lsa, — muayyan huquqdan mahrum qilib, yetti yilgacha ozodlikdan mahrum qilish bilan jazolanadi.
Endi qarang! Jinoyat kodeksning 66 prim 1-moddasiga ko‘ra ushbu Kodeks 266-moddasining birinchi qismida (transport vositalari harakati yoki ulardan foydalanish xavfsizligi qoidalarini buzish) nazarda tutilgan jinoyatni sodir etgan shaxs, agar u o‘z aybiga iqror bo‘lsa, jabrlanuvchi bilan yarashsa va yetkazilgan zararni bartaraf etsa, jinoiy javobgarlikdan ozod etilishi mumkin.
Agar siz o‘z aybingizga iqror bo‘lsangiz, jabrlanuvchi bilan yarashsangiz va yetkazilgan zararni bartaraf etsangiz, jinoiy javobgarlikdan ozod etilishingiz mumkin faqat Jinoyat kodeksining 266-moddasi 1-qismida belgilangan huquqbuzarlikni sodir etgan bo‘lsangiz.
Biroq sizning yuqorida keltirgan harakatingiz odam o‘lishiga sabab bo‘lsa muayyan huquqdan mahrum qilinib, yetti yilgacha ozodlikdan mahrum qilish bilan jazolanishingiz mumkin ya’ni yarashuv bu holatda qo‘llanilmaydi.
Lekin sud Jinoyat kodeksining 55-moddasida nazarda tutilgan “aybni bo‘yniga olish to‘g‘risida arz qilish, chin ko‘ngildan pushaymon bo‘lish”ni inobatga olib, sizning harakatlaringizni jazoni yengillashtiruvchi holat deb topib yengilroq jazo tayinlashi yoki Jinoyat kodeksining 57-moddasiga ko‘ra jinoyat uchun belgilangan jazoning eng kam qismidan ham kamroq yoki shu moddada nazarda tutilmagan boshqa yengilroq turdagi jazoni tayinlashi mumkin.
