AGAR OTADA MODDIY IMKONIYAT YAXSHI BO‘LSA, U BOLANI ONADAN OLIB QO‘YISHGA HAQLIMI?
SAVOL.
Xotinim bilan ajrashdim, hozir farzandimiz u bilan qolgan. Sobiq xotinim otasini uyida yashayapti. Mening moddiy ahvolim ancha yaxshi bolamni yaxshi boqa olaman, sobiq xotinimni ota uyida yetishmovchilik ko‘p. Savol, men sudga berib bolani o‘zimga olishim mumkinmi? Sud meni imkoniyatlarimni hisobga oladimi?
JAVOB.
Alohida-alohida turadigan ota-onalar tomonidan bolani tarbiyalashga oid ishlarni ko‘rishda sudlar e’tibor beradigan turli jihatlar bor.
Bu bo‘yicha Oliy sud Plenumining 1998 yil 11 sentyabrdagi “Bolalar tarbiyasi bilan bog‘liq bo‘lgan nizolarni hal qilishda sudlar tomonidan qonunlarni qo‘llash amaliyoti to‘g‘risida”gi qarori (3-bandi)da alohida ko‘rsatmalar berilgan.
Bu qarorga ko‘ra, ota-onadan birining moddiy-maishiy ahvoli ustunligining o‘zi bolani unga olib berish uchun asos bo‘la oladigan shart hisoblanmasligi nazarda tutiladi.
▪️Bunda sudlar:
➖bolaning ota-onadan, aka-uka, opa-singillaridan qaysi biriga bog‘lanib qolganligini;
➖ota-onadan qaysi biri bolalariga nisbatan ko‘proq g‘amxo‘rlik va e’tibor ko‘rsatayotganligini;
➖bolalarning yoshini va ota-onadan qaysi biriga ko‘ngil qo‘yganligini;
➖ota-onaning axloqiy va boshqa shaxsiy fazilatlarini;
➖ota-onaning har biri bilan bola o‘rtasidagi munosabatlarni;
➖bolani tarbiyalash va uning kamoloti uchun shart-sharoitlar (ota-onasining ma’lumot turi, ish tartibi, moddiy hamda oilaviy ahvoli va boshqalar) yaratish imkoniyatini e’tiborga oladi.
Ya’ni, faqatgina moddiy ahvolning yaxshiligi yoki onaga nisbatan otada moliyaviy vaziyat bo‘yicha ustunlik borligining o‘zi bolani otaga olib berishga asos bo‘lmaydi.
Ko‘rib turganingizdek, o‘rtada masalaning ma’naviy va mehr bilan bog‘liq bo‘lgan o‘ta muhim bo‘lgan tomonlari ham bor.
