‼️XOTIN PUL TOPMAGAN BO‘LSA HAM ERNING TOPGANINI YARMI XOTINNIKI
✳️ Savol: Meni uchta farzandim bor. Xo‘jayinim boshqa ayolga uylanib, bizni uydan haydadi. Hozir ajrashishga sudga ariza bergan. Erimni nomida hovli uy va ikkita avtomashina bor. Uni aytishi bo‘yicha men uyda o‘tirib, pul topmaganim uchun meni bularda haqim yo‘q ekan. Men haqiqatan ham ishlamaganman, uyda bolalarga qaraganman. Meni va bolalarimni qanday huquqimiz bor? Sudda bolalarimga uy-joy qilib bermaguncha ajrashmayman deb aytsam bo‘ladimi?
✅ Javob: Oila kodeksining 23 moddasiga ko‘ra er va xotinning nikoh davomida orttirgan mol-mulklari, shuningdek nikoh qayd etilgunga qadar, bo‘lajak er-xotinning umumiy mablag‘lari hisobiga olingan mol-mulklari, agar qonun yoki nikoh shartnomasida boshqacha hol ko‘rsatilmagan bo‘lsa, ularning birgalikdagi umumiy mulki hisoblanadi.
Er va xotindan biri uy-ro‘zg‘or ishlarini yuritish, bolalarni parvarish qilish bilan band bo‘lgan yoki boshqa uzrli sabablarga ko‘ra mustaqil ish haqi va boshqa daromadga ega bo‘lmagan taqdirda ham er va xotin umumiy mol-mulkka nisbatan teng huquqqa ega bo‘ladi.
Siz pul ishlab topganmisiz yo uyda o‘tirganmisiz, buni farqi yo‘q. Nikoh davomida eringiz ishlab topgan barcha daromadlar va mulklar eringiz nomida turganligidan qat’iy nazar siz va eringizning umumiy mulkingiz hisoblanadi.
Bitta istisno, agar nikoh shartnomasi tuzilib, unda boshqacha qoida belgilangan bo‘lsa, nikoh shartnomasi shartlari amal qiladi. Shuningdek, eringizga hadya yoki meros bo‘lib o‘tgan mulklar ham sizning umumiy mulkingiz hisoblanmaydi.
Siz fuqarolik sudiga umumiy mulkni bo‘lishni so‘rab murojaat qilishingiz mumkin. Bunday arizani nikohdan ajratish haqidagi ishda berishni keragi yo‘q. Chunki bu alohida da’vo talabi bo‘lib, alohida ish sifatida ko‘rib chiqiladi. Siz qonuniy ajrashmagan bo‘lsangiz ham umumiy mulkdagi ulushingizni bo‘lib berishni talab qilishga haqlisiz.
Bundan tashqari, siz eringiz nomiga olingan uyning egalaridan biri bo‘lganligingiz sababli fuqarolik sudiga o‘zingizni va farzandlaringizni uyga kiritib qo‘yish haqida da’vo ariza bilan murojaat qilishingiz mumkin.
Farzandlaringiz uchun esa aliment undirishni so‘rab murojaat qilsangiz bo‘ladi.
