"Nexia 3" va "Kobalt" rusumli avtomobillarga mobil radarlar o‘rnatilgani haqida haydovchilar ogohlantirilishi shartmi?
Vazirlar Mahkamasining 2022 yil 12 apreldagi 172-son qarori bilan tasdiqlangan "Yo‘l harakati qoidalari"ga ko‘ra 5.41 (Foto va video qayd etish) yo‘llarda avtomobil haydovchilari Qoidalar talabiga rioya etishi elektron qurilmalar yordamida nazorat qilinayotganligini bildiruvchi yo‘l belgisidir.
Ushbu yo‘l belgisi Qoidalar talabiga rioya etilishi statsionar elektron qurilmalar orqali nazoratga olingan joylarga o‘rnatiladi.
Qoidalarga asosan 5.43 (Radar) yo‘llarda avtomobil haydovchilari belgilangan tezlikka rioya etishi radarlar yordamida nazorat qilinayotganligini bildiruvchi yo‘l belgisidir.
Ushbu yo‘l belgisi belgilangan harakatlanish tezligi statsionar maxsus texnika vositalari yordamida nazoratga olingan joylarga o‘rnatiladi.
❗️Shuningdek, viloyat, tuman, shaharlar boshlanadigan joylardagi ko‘cha va yo‘llarda harakatlanish tezligi mobil radarlar yordamida nazorat qilinayotganligi to‘g‘risida haydovchilarni ogohlantirish maqsadida o‘rnatilishi mumkin.
Demak, "Nexia 3" va Kobalt rusumli avtomobillarga o‘rnatilgan mobil radarlar statsionar ya’ni joyidan qo‘zg‘almaydigan maxsus texnika vositalariga kirmaydi. Chunki ularni bir hududdan boshqa hududga ko‘chirish mumkin.
5.43. yo‘l belgisi esa yo‘llarda avtomobil haydovchilari belgilangan tezlikka rioya etishi radarlar yordamida nazorat qilinayotganligini bildiradi va ushbu yo‘l belgisi belgilangan harakatlanish tezligi statsionar maxsus texnika vositalari yordamida nazoratga olingan joylarga o‘rnatilishi shart!
❗️Lekin Yo‘l harakati Qoidalarida harakatlanish tezligi mobil radarlar yordamida nazorat qilinayotganligi to‘g‘risida haydovchilarni ogohlantirish maqsadida ushbu belgi o‘rnatilishi mumkin deyilgan. Bu degani xohlasa o‘rnatishadi xohlamasa yo‘q.
Demak, "Nexia 3" va Kobalt rusumli avtomobillarga o‘rnatilgan mobil radarlar borligi haqida ogohlantirishlari ularning ixtiyorida ekan. Ogohlantirishmasa ham qonuniy bo‘laveradi.
Shu sababli yo‘llarda harakat tezligini belgilangan me’yordan oshirmang! Zero, yo‘l qoidasi umr foydasi.
