Ba’zi ish beruvchilar xodimlarni “statya bilan bo‘shataman, ertaga birorta joyga kirolmaysan, yaxshisi ariza yozib ber” deb qo‘rqitadi.
Hurmatli xodimlar, bular hammasi bekor gaplar.
Sababi, birinchidan, xodimning ish beruvchi tashabbusi bilan, yoki intizomiy jazo sifatida bo‘shatilgani haqidagi ma’lumotlar mehnat daftarchasida yozilmaydi (MK 125-modda) va agar bu yozilsa, ish beruvchiga javobgarlik bor.
Ikkinchidan, ishdan bo‘shagan xodim boshqa tashkilotga ishga kirayotganda undan avvalgi ishxonasidan bo‘shaganligi haqidagi buyruq talab qilinishi mumkin emas (MK 124-modda).
Ya’ni, xodimning nizoli tashkilotdan ishdan bo‘shab, keyingi tashkilotga ishga kirishida, keyingi tashkilot uning qaysi sabablarga ko‘ra ishdan bo‘shaganligi haqida rasmiy hujjatga ega bo‘la olmaydi.
Yoki “avval falon joydan falon sabab bilan ishdan bo‘shatilgan ekansiz” deb to‘g‘ridan to‘g‘ri rad javobi bera olishmaydi (MK 119-modda).
Xodimlar kerakli joyida o‘z huquqini bilishi kerak va bu borada cho‘chimasligi kerak, “ariza yozmasang, statya bilan bo‘shataman” degan odamga “uzr, damingizni olib turing” deb to‘g‘ri tushuntirvorish kerak.
