‼️ISHIMNI HAL ETISH UCHUN PUL BЕRGANDIM, QANDAY QAYTARIB OLSAM BO‘LADI?
✅Agar siz pul bergan odam shu ishni hal qilish vakolatiga ega bo‘lgan bo‘lsa, yoki pullarni shu ishni hal eta oladigan odamga bergan bo‘lsa, siz pora beruvchi, o‘sha odam pora olgan yoki vositachi hisoblanadi va bu qilmish jinoyat xisoblanadi.
✅ Agar shunday bo‘lsa, pullaringizni ololmaysiz. Bu pullar pora bo‘lganligi uchun davlat foydasiga musodara qilinadi.
‼️Jinoyat kodeksi 211-moddasiga muvofiq pora berish, ya’ni davlat organi, davlat ishtirokidagi tashkilot yoki fuqarolarning o‘zini o‘zi boshqarish organi mansabdor shaxsiga mazkur mansabdor shaxsning o‘z xizmat mavqeidan foydalangan holda sodir etishi lozim yoki mumkin bo‘lgan muayyan harakatni pora bergan shaxsning manfaatlarini ko‘zlab bajarishi yoki bajarmasligi evaziga qonunga xilof ekanligini bila turib bevosita yoki vositachi orqali moddiy qimmatliklar berish yoki uni mulkiy manfaatdor etish, — bazaviy hisoblash miqdorining ellik baravaridan yuz baravarigacha miqdorda jarima yoki ikki yildan besh yilgacha ozodlikni cheklash yoxud besh yilgacha ozodlikdan mahrum qilish bilan jazolanadi.
✅ Lekin sizdan pul olgan shaxs bu pullarni hech kimga bermasdan, uni o‘z manfaatlari yo‘lida o‘zlashtirib olgan bo‘lsa, unda sizda pullaringizni qaytarib olish imkoni bo‘ladi.
✅Oliy sudi Plenumining 2017 yil 11 oktyabrdagi 35-sonli «Firibgarlikka oid ishlar bo‘yicha sud amaliyoti to‘g‘risida»gi qarori 22-bandi ikkinchi xatboshiga ko‘ra agar shaxs (shu jumladan mansab vakolati yo‘qligi yoki o‘z xizmat mavqeidan foydalana olmasligi tufayli muayyan harakat (harakatsizlik)ni aslida amalga oshira olmaydigan mansabdor shaxs), go‘yoki mansabdor shaxsga pora sifatida berish uchun pul yoki boshqa qimmatliklarni olib, biroq aslida bunday niyati bo‘lmasdan, ularni o‘zlashtirsa, qilmish firibgarlik sifatida kvalifikatsiya qilinishi lozim.
❌ Biroq pul va boshqa qimmatliklar ular egasining tashabbusi bilan, bila turib, pora predmeti sifatida berilgan hollar bundan mustasno. Ya’ni siz o‘z xohishingiz bilan pulni muammoni hal etish uchun pora sifatida bergan bo‘lsangiz, unda pullar qaytarilmaydi.
