Oʻgʻlim balogʻat davrida.Kuchli qoʻrqmas boʻlishi uchun nima qilishim kerak?
Bunday paytda oʻgʻil bolani sport toʻgaraklariga bergan maʼqul. Masalan, sambo yoki boksga. Kurash maydonida chiniqqan bolada qoʻrquv yoʻqoladi, iroda mustahkamlanadi. Asosiysi, u oʻzini oʻzi himoya qilish usullarini oʻrganadi. Tengdoshlari bilan oʻrtada gap qochganda ham, bir marta jismoniy kuchini koʻrsatsa, bas. Keyin undan hayiqishadi.
Lekin farzandingiz boʻlar-boʻlmasga urishib, mushtlashishiga zinhor yoʻl qoʻymang. Bordiyu birov bilan yoqalashib kelgan taqdirda ham, sababini surishtiring. Agar adolat uchun kurashgan boʻlsa, koyimang. Aksincha, maqtab qoʻying.
Boshqa tomondan, qoʻrqoqlik sindromi bolada notoʻgʻri tarbiya oqibatida ham shakllanishi mumkin. Baʼzi ota-onalar farzandidagi muayyan intilish, aytaylik, oʻz fikrini ifodalash his-tuygʻulari, oʻrni kelganda, hatto jahlini namoyon etishga yoʻl qoʻymaydi. Ogʻzini darhol yumadi. Natijada, farzand ichki dunyosiga biqinib qoladi, birovga ortiqcha gap aytishdan qoʻrqadi, oʻzini himoya qilishga jurʼati yetmaydi. Safdoshlari koʻpincha bunday bolalarning ustidan kulib, izza qilishga odatlanadi.
♂️Yana bir jihat: oʻgʻil bola tarbiyasi unda erkaklik sifatlarini shakllantirish bilan baravar olib borilishi shart. Mazkur jarayonda otaning roli nihoyatda katta. Ota oʻz xatti-harakatlari orqali farzandiga uy-roʻzgʻor yumushlarining qaysi biri oila boshligʻi zimmasida ekanini anglatmogʻi lozim. Masalan, bozor-oʻchar qilish, uy tozalanayotganida ogʻir jihozlarni surib qoʻyish yoki buzilib qolgan buyumlarni sozlashga oʻxshash vazifalarni uyda erkak bajarishi kerakligini u yaxshi uqib olsin. Bora-bora mazkur koʻnikma farzandingizda avtomatik darajaga yetadi.
