QUYI TASHKILOT RAHBARI O‘Z O‘RINBOSARIGA INTIZOMIY JAZO QO‘LLASHI MUMKINMI?
SAVOL.
Men bir davlat tashkilotida ishlayman, bizni qoshimizda davlat muassasasi bor, ushbu muassasa direktori va o‘rinbosarlari bizni rahbar tomonidan lavozimga tayinlanadi va ozod etiladi, gap shundaki o‘sha muassasa direktori o‘z o‘rinbosarlariga o‘zi intizomiy jazo chorasini qo‘llay oladimi?
JAVOB.
Yo‘q, qo‘llay olmaydi. Sababi, MK 313-moddasining birinchi qismida:
"intizomiy jazo choralari ishga qabul qilish huquqi berilgan shaxslar (organlar) tomonidan qo‘llaniladi" deyilgan.
Bu qoidaga asosan, o‘sha muassasa rahbari o‘rinbosariga intizomiy jazoni faqatgina uni ishga qabul qiluvchi yuqori tashkilot rahbari qo‘llashi mumkin.
Agar o‘sha davlat muassasasi direktori o‘z o‘rinbosari faoliyatidan norozi bo‘lsa va unga intizomiy jazo qo‘llanilishini istasa, yuqori tashkilot rahbariga murojaat (taqdimnoma yoki bildirishnoma) bilan chiqishi kerak.
Shunda yuqori tashkilot rahbari tomonidan muassasa rahbari o‘rinbosariga MK 312-315-moddalar talablariga rioya qilgan holda intizomiy jazo qo‘llanilishi to‘g‘ri bo‘ladi.
Ba’zi tashkilotlarda, ko‘pincha, yuqori tashkiloti bo‘lmagan korxonalarda o‘rinbosarni ishga qabul qilish va bo‘shatish vakolati shu tashkilot rahbarining o‘zida bo‘ladi. Bunday hollarda rahbar o‘z o‘rinbosariga bemalol intizomiy jazo qo‘llashi mumkin
