Surxondaryoda dunyodagi eng katta so‘zana tikilmoqda
Joriy yilning may oyida o‘tkaziladigan “Boysun bahori” ochiq folklor festivali uchun boysunlik hunarmandlar tomonidan uzunligi 31, eni 5.20 metrni tashkil etadigan milliy so‘zana tikilmoqda. Bu haqda Boysun tumani hokimligi Axborot xizmati rahbari Yunus Xoliyorov ma’lum qildi.
Naqshinkor milliy so‘zanani nozik did, yuksak mahorat bilan tikish uchun “Faol tadbirkor” ko‘krak nishoni sohibasi Malika Podshoyeva boshchiligida 100 nafar mohir kashtado‘z jalb etilgan. Hozirda alvon matoga surxoncha serjilo naqshlar chizmasini tushirish hamda tabiiy usullarda bo‘yalgan kalava iplarni tanlash ishlari olib borilmoqda.
Eslatib o‘tamiz, boysunlik hunarmandlar tomonidan tikilgan, uzunligi 25, eni esa 6 metrni, og‘irligi 60 kilogrammni tashkil etgan dunyodagi eng katta so‘zana 2019 yilning aprel oyida Termiz shahrida o‘tkazilgan baxshichilik san’ati festivalida ilk bor namoyish etilgandi.
