Quyosh panellarini o‘rnatish majburiymi?
@Yurist_Xizmati 4344-savol:
Assalomu alaykum, do‘konga ijara shartnomani yangilashlik uchun hokimiyatga ariza berilganda :Quyosh paneli o‘rnatilmaganligi uchun ijarani yangilab bera olishmasligini va bunga PQ-57 ni sabab qilib ko‘rsatishligi qonuniymi ? biz quyosh paneli o‘rnatishimiz majburiymi?
YURIST JAVOBI:
❌ Quyosh panellarini o‘rnatish majburiy emas.
O‘zbekiston Respublikasi Prezidentining 16.02.2023 yildagi PQ-57-son qarorida 2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida qoidalar belgilangan.
♂️ Ushbu qarorda quyosh panellarini o‘rnatish majburiyligi haqida qoida mavjud emas. Aksincha quyosh panellarini o‘rganlar uchun alohida imtiyozlar berilgan.
Misol uchun, qaror 9-bandiga ko‘ra umumiy quvvati 100 kVtgacha bo‘lgan qayta tiklanuvchi energiya manbalari qurilmalarini o‘rnatgan va ulardan foydalanuvchi shaxslar, ular foydalanishga topshirilgan kundan e’tiboran uch yil muddatga, quyidagi soliqlarni to‘lashdan ozod etiladi:
➡️ ushbu qurilmalar bo‘yicha — yuridik shaxslarning mol-mulkiga solinadigan soliqni, alohida turuvchi qurilmalar bilan band bo‘lgan yer uchastkalari bo‘yicha — yuridik shaxslardan olinadigan yer solig‘ini, elektr energiyasini umumiy tarmoqqa sotishdan olingan foyda bo‘yicha — foyda solig‘ini;
➡️ uy-joy fondining ko‘chmas mulk obektlari bo‘yicha jismoniy shaxslardan olinadigan mol-mulk solig‘i va jismoniy shaxslardan olinadigan yer solig‘ini.
Lekin shartnoma muddatini uzaytirishda ijaraga beruvchi qo‘shimcha talablarni qo‘yishi mumkin. Chunki Fuqarolik kodeksining 384-moddasi birinchi qismiga binoan shartnoma qanday shaklda tuzilgan bo‘lsa, uni o‘zgartirish yoki bekor qilish to‘g‘risidagi kelishuv ham shunday shaklda tuziladi. Shartnomaning muddati ham shartnoma sharti hisoblanadi. Shunga ko‘ra taraflar shartnoma shartlarini o‘zaro kelishgan holda o‘zgartirishi mumkin.
Ushbu kodeks 1-moddasida ham taraflar shartnoma asosida o‘z huquq va burchlarini belgilashda va qonunchilikka zid bo‘lmagan har qanday shartnoma shartlarini aniqlashda erkin ekanligi qayd etilgan. Ushbu norma ham yuqoridagi fikrni tasdiqlaydi.
♂️ Bunday vaziyatda taraflar o‘zaro kelishsa, shartnoma imzolanadi agar ular o‘rtasida kelishuv bo‘lmasa, shartnoma muddati uzaytirilmaydi.
