Tartibsiz mehnat muhiti oilaviy muammolarga ham sabab bo‘ladi.
Bizningcha, oilalardagi notinchlik va nizolarning asosiy sabablaridan biri bu odamlarning o‘z oilasiga, ota-onasi, turmush o‘rtog‘i va farzandlariga vaqt ajrata olmasligi va yetarlicha e’tibor qaratmasligida bo‘lyapti.
Yaxshilab qarasangiz, ishdan keyin va dam olish kunlari ham doimiy ravishda ishda o‘tiradigan xodimlarda oilaviy kelishmovchiliklar, xususan, ajrimlar ko‘p bo‘ladi.
Chunki ularning ishdan keyin va dam olish kunlari o‘z oilasiga va farzandlariga ajratishi kerak bo‘lgan asosiy vaqtini biz rahbarlar bilib-bilmay o‘g‘irlayapmiz.
Bundan buyog‘iga bizga har bir tarmoq bo‘yicha puxta ishlab chiqilgan mehnat normasi va har bir ish va lavozim bo‘yicha to‘g‘ri yo‘naltirilgan mehnat taqsimoti kerak.
Agar belgilangan ish vaqti ichida har bir ishchi-xodim kunlik mehnat normalarini bajarsa, ularni ishdan keyin ushlab turishga asos ham, mantiq ham bo‘lmaydi.
Shunda oilalar ham tinch bo‘ladi, ajrimlar ham kamayadi, bolalar ham tirik yetim bo‘lmaydi.
Eslatib o‘tamiz, amaldagi Mehnat kodeksining 272-278-moddalari mehnatni normalashtirish qoidalariga bag‘ishlangan.
