Bemor shifoxonada davolanish uchun yo‘llanmani qay tartibda oladi?
Mamlakatimizda davlat tibbiy sug‘urtasi mexanizmlari bosqichma-bosqich joriy etilayotganidan xabaringiz bor. Bunda asosiy maqsadlardan biri birlamchi tibbiy-sanitariya yordami ko‘lamini kengaytirish, oilaviy shifokorning maqomini ko‘tarishdir.
Quyida ushbu mexanizm asosida bemorning kasalligi o‘tkir holatidagi yo‘nalishi keltirilgan.
⚕️ Ta’kidlash joizki, davlat tibbiy sug‘urtasi mexanizmlari doirasida bemor tuman (shahar) ko‘p tarmoqli markaziy poliklinikalari va viloyat shifoxonalarida davolanish uchun yo‘llanmani oilaviy shifokor ko‘rigidan o‘tgach, tor soha mutaxassisi tavsiyasiga ko‘ra, elektron tarzda oladi.
Ya’ni, avvalgi qog‘ozbozliklarga barham berilib, bemor yo‘llanmani qo‘liga ham olmaydi. Oilaviy shifokorning o‘zi ushbu hujjatni va bemorning kasalligi haqidagi ma’lumotlarni kerakli shifoxonaga elektron tizim orqali yuboradi. Yo‘llanma asosida unga kafolatlangan bepul tibbiy xizmat ko‘rsatiladi.
Asosiy maqsad jarayon raqamlashtirilgan tizim orqali amalga oshirilib, davolanish uchun yo‘llanmalarning navbatlarsiz, sarsongarchiliksiz taqdim etilishidir.
✅ Eslatib o‘tamiz, milliy sog‘liqni saqlash tizimiga joriy etilayotgan davlat tibbiy sug‘urtasi mexanizmida har bir fuqaroning salomatligi kafolatlangan paket asosida ko‘rsatilgan tibbiy xizmatlar davlat budjeti mablag‘i hisobidan qoplab beriladi. Fuqarolardan sug‘urta badali undirilmaydi.
Bu bilan sohaga ajratilayotgan budjet mablag‘laridan maqsadli va samarali foydalanish, kasalliklarni erta aniqlash, aholiga ko‘rsatilayotgan tibbiy xizmat sifati, samaradorligi va ommabopligini oshirishga erishiladi
