Xodim ta’tilga ariza yozib, javobini kutmasdan ta’tilga ketib qoldi...
Xodim bo‘lim boshlig‘iga unga 10 kun ish haqi saqlanmagan ta’til kerakligini aytdi. Bo‘lim boshlig‘i kadrga murojaat qilishi kerakligini tushuntirdi. Xodim shunda ish haqi saqlanmagan ta’tilga chiqish haqida ariza yozdida, arizani kadrga berib, bir nusxasiga “oldim” deb imzo qo‘ydirib, kadr hay-xay degunicha uyiga ketib qoldi. Ertasi kuni ham, indin ham ishga kelmadi.
Natijada xodim MK 161-modda ikkinchi qism 5-bandi bilan ishdan bo‘shatildi. Sababi, bir kun davomida 4 soatdan ortiq vaqt ishda bo‘lmaslik tashkilot Ichki mehnat tartibi qoidalarida mehnat majburiyatlarini bir marta qo‘pol buzilishi sifatida ko‘rsatilgan edi.
Keyin nima bo‘ldi? Topdingiz, xodim sudga berdi. Sudda u ish haqi saqlanmagan ta’tilga ketganligi, qo‘lida ta’tilga ketish haqidagi arizaning bir nusxasi borligi va unga kadrlar bo‘limi boshlig‘i “bir nusxasini oldim” deb imzo qo‘yganligini bildirdi. Qo‘lidagi hujjatlarni sudga taqdim etib, uni ishga tiklashni va ish beruvchidan moddiy-ma’naviy zararlarni undirib berishni so‘radi.
U bo‘ldi, bu bo‘ldi, 3 ta sud majlisidan keyin sud ishi yakuniga yetdi. Sud xodimning ishga tiklash haqidagi da’vosini rad qildi. Xo‘sh, nimaga?
Sababi, Oliy sud Plenumining 2023 yil 20 noyabrdagi "Sudlar tomonidan mehnat shartnomasini bekor qilishni tartibga soluvchi qonunchilikni qo‘llash amaliyoti to‘g‘risida"gi 26-son qarori 38-bandiga asosan ish beruvchining ruxsatisiz o‘zboshimchalik bilan ta’tilga ketish yoxud o‘zboshimchalik bilan dam olish kunlari (otgul)dan foydalanish ham uzrsiz sabablarga ko‘ra ishda bo‘lmaslik hisoblanadi.
Haqiqatdan ham, xodim ish haqi saqlanmagan ta’tilga ariza yozgan, lekin bu ariza yuzasidan ta’tilga ketishiga ish beruvchi rozilik bermagan. Xodim esa, ish beruvchining rasmiy munosabatini va ruhsatini kutmasdan turib o‘zboshimchalik bilan ta’tilga ketib qolgan.
Qolaversa, MKning 241-moddasi birinchi qismida ham bekordan-bekorga “xodimning yozma arizasiga ko‘ra unga ish haqi saqlanmaydigan ta’til berilishi mumkin bo‘lib, uning davomiyligi xodim va ish beruvchi o‘rtasidagi kelishuvga ko‘ra belgilanadi” deyilmagan.
Ya’ni, xodim ish haqi saqlanmagan ta’tilga ketar ekan, uning muddati ish beruvchi bilan kelishilishi shart edi. Lekin, bu ishda xodim mazkur qoidaga ham rioya qilmagan.
Demak, sudning qarori to‘g‘ri bo‘lgan.
