ONLAYN SOTIB OLGAN MAHSULOTLARIM "BRAK" CHIQDI. ENDI NIMA QILAMAN?
Assalomu Alaykum yurist maslaxati boti xodimlari. Men shu yilning 15 fevralida Zood Mall internet magazinidan 3 ta tovarni muddatli tulov asosida xarid kilgan edim. Menga uchala tovarni vaktida yetkazib berishdi. Birok junatilgan tovarlardan ikkitasi ular tomonidan berilgan reklamasida kursatilgan xolatga umuman javob bermadi. Ya’ni "porkovichniy kamera" ning videopleyeri yuk, ikkinchi tovar "Usilitel WI FI" ni ustanovka kilib bulmadi. Men ularga junatilgan tovarning kamchilik va nosozliklari buyicha murojat etib, tovarni boshkasiga almashtirib berishlarini yoki oldi sotdi shartnomasini bekor kilishlarini surab SMS va Foto xabarlarni junatdim. Lekin ular junatishgan tovarlardagi kamchiliklarni bartaraf etmasdan, Menga navbatdagi tulovni amalga oshiring deb tuxtamasdan SMS junatishmokda va Mening roziligimsiz plastik kartamdan pul yechib olishdi. Menga ushbu xolat buyicha yuridik maslaxat berishlaringizni surab kolaman.
JAVOB:
Bu vaziyatda sizning bir qancha huquqlaringiz buzilgan. Tushuntiramiz.
Fuqarolik kodeksining 408-moddasiga ko‘ra agar tovarning kamchiliklari sotuvchi tomonidan ma’lum qilinmagan bo‘lsa, tegishli darajada sifatli bo‘lmagan tovar topshirilgan sotib oluvchi ushbu Kodeksning 434-moddasida nazarda tutilgan huquqlarga ega bo‘ladi.
Tovarning butliligiga kiradigan qismi tegishli darajada sifatli bo‘lmasa, sotib oluvchi mazkur tovarga nisbatan ushbu Kodeksning 434-moddasida nazarda tutilgan huquqlarni amalga oshirishga haqli.
E’tibor bering! Tegishli darajada sifatli bo‘lmagan tovarni sotgan shaxs uni tayyorlagan bo‘lmasa, tovarni almashtirish yoki uning kamchiliklarini tekinga bartaraf etish haqidagi talablar sotuvchiga yoki tovarni tayyorlovchiga qo‘yilishi mumkin.
❗️Mazkur kodeksning 434-moddasiga binoan sotib oluvchiga sifati tegishli darajada bo‘lmagan tovar sotilganida, agar uning kamchiliklari shartnoma tuzish paytida ma’lum qilinmagan bo‘lsa, sotib oluvchi o‘z xohishiga ko‘ra:
➖ xuddi shu markadagi (modeldagi, artikuldagi) sifati tegishli darajada bo‘lgan tovarga almashtirishni;
➖ xarid narxini tegishincha qayta hisoblagan holda boshqa markadagi (modeldagi, artikuldagi) sifati tegishli darajada bo‘lgan tovarga almashtirishni;
➖ tovarning kamchiliklarini tekinga bartaraf etishni yoki sotib oluvchi yoxud uchinchi shaxs tomonidan tovarning kamchiliklarini bartaraf etish uchun qilingan xarajatlar qoplanishini;
➖ xarid narxini mutanosib ravishda kamaytirishni;
➖ ko‘rilgan zarar o‘rnini qoplagan holda shartnoma bekor qilinishini talab qilish huquqiga ega.
Diqqat qiling! Tovar uchun to‘langan pul summasini sotib oluvchiga qaytarish vaqtda sotuvchi undan tovardan to‘liq yoki qisman foydalanganligi, tovar ko‘rinishi yo‘qolganligi yoki boshqa shunga o‘xshash holatlar tufayli tovar qiymati qancha pasaygan bo‘lsa, shuncha summani ushlab qolishga haqli emas.
Demak, siz bu masalada Istemolchilar xukukini ximoya kilish agentligiga (71-207-46-00 yoki qisqa 1159 raqamlari ) shikoyat qilishingiz yoki fuqarolik sudiga da’vo ariza bilan murojaat qilib ko‘rilgan zarar o‘rnini qoplagan holda shartnoma bekor qilishni talab qilishingiz mumkin.
