SЕVISHGANLAR OILA QURISHI QONUNAN TAQIQLANDIMI?
⚡️SAVOL;
Men yoqtirgan qiz oilasi bilan qonunan ajrashgan. Men hali uylanmaganman. Biz u qiz bilan bir-birimizni yaxshi ko‘ramiz ya’ni, bir birimizni sevamiz. Munosabatimiz jiddiy va u bilan qonuniy nikohdan o‘tib oila qurmoqchimiz. Meni ikkilantirgan masala shuki, yaqinda bir davlat tashkilotida ishlaydigan tanishim yangi Qonun chiqqanligini, o‘sha qonunga ko‘ra erga tegib chiqqan qizlar bilan qonuniy nikohdan o‘tish taqiqlanganini aytishdi. Uni shu gaplari to‘g‘rimi, biz bir-birimizni yoqtirgan taqdirimizda xam buning imkoni yo‘qmi, yoki aynan sevishganimiz uchun iloji yo‘qmi ?
⚡️JAVOB;
Ex yoshlar, yoshlar. Yurakdan yomon ketibsizu. Mayli qarang! Birinchidan, erga tegib chiqqan qizlar bilan qonuniy nikohdan o‘tish taqiqlanadi degan yangi Qonun chiqqani yo‘q. Bunday Qonun chiqmaydi xam. Chunki bunday Qonun chiqsa oqibati yaxshilik bilan tugamaydi. Ikkinchidan, o‘sha tanishingiz o‘zi tushunmay Sizga tushuntirmoqchi bo‘lgan narsasi shuki, Oila kodeksining 16-moddasida nikoh tuzishga monelik qiladigan holatlar ko‘rsatilgan bo‘lib, unga ko‘ra loaqal bittasi ro‘yxatga olingan boshqa nikohda turgan shaxslar o‘rtasida nikoh tuzishga yo‘l qo‘yilmasligi belgilangan.
✏️ Agar o‘sha Siz sevgan qiz birinchi oilasidan qonuniy ajrashgan bo‘lsa ya’ni, nikohi rasman bekor qilingan bo‘lsa u bilan qonuniy nikohdan o‘tishingizga hech qanday to‘sqinlik yo‘q. Agar uning nikohi hali rasman bekor qilinmagan bo‘lsa unda Sizlar FHDYO bo‘limidan qonuniy nikohdan o‘ta olmaysizlar.
✏️ Uchinchidan, Siz uni sevasizmi, qanchalik sevasiz, qachondan beri sevasiz va qayeringiz bilan sevasiz buni qonunchilikka umuman qizig‘i yo‘q. Uni sevmasangiz xam farqi yo‘q. Agar qizni birinchi oilasidagi qonuniy nikohi bekor qilingan bo‘lsa sevishmasdan turib xam qonuniy oila qurish mumkin. Agar unday bo‘lmasa sevgingizni isboti uchun tog‘ni bu tarafidan kirib nargi tarafidan chiqsangiz xam FHDYO bo‘limi Sizlarni qonuniy nikohdan o‘tkazmaydi..
