Qaysi mahsulotlarni och qoringa iste’mol qilib bo’lmaydi Sog'lom turmush tarzi Hech e’tibor berganmisiz, ba’zi bir mahsulotlar och qoringa iste’mol qilinganda oshqozonga noqulaylik tug’diradi? Ko’pincha ishlar bilan bo’lib, yaxshiroq nonushta qilishga vaqtimiz yetmaydi. Ammo aynan ertalab bizning organizm ta’sirchan bo’lib, hamma narsani bir xilda hazm qila olmaydi. Agarda kuningizni yaxshi kayfiyatda boshlashni istasangiz, unda ertalabki nonushtangizni qayta ko’rib chiqishingizni maslahat beramiz. Bu maqolada siz och qoringa nimalar yeb bo’lmasligi haqida ma’lumotga ega bo’lasiz. Qahva Organizmga qahva birinchilardan bo’lib qabul qilinsa, xlorid kislotasini haddan ortiq ishlab chiqarib, natijada hazm qilish tizimining buzilishiga olib keladi. Ertalabki soat 6 dan 10 gacha organizm kortizol garmonini ishlab chiqarib, bu garmon tetiklik va quvvatni oshirishda xizmat qiladi. Och qoringa qabul qilingan bir finjongina qahva kortizol garmonini ishlab chiqarilishini to’xtatib, natijada charchoq va uyqusizlik tark etmasligidan aziyat chekamiz. Agarda kun mobaynida o’zingizni behol va bemajol sezsangiz, unda qahva o’rniga bir stakan iliq suv ichib ko’ring. Qahvani esa kun mobaynida soat 10 dan 12 gacha yoki 14 dan 17 gacha ichishingiz mumkin. Sitrus mevalar Apelsin, mandarin, greypfrut va boshqa sitrus mevalar juda foydalidir, ammo och qoringa emas. Ular o’zida ko’p miqdorda limon kislotasini saqlashi sabab ham, xuddi qahvadek oshqozon shilliq qavatini yallig’lanishiga sabab bo’lishi mumkin. Natijada oshqozon faoliyati buzilib, har xil kasalliklar va allergiyaga yo’liqishning ham xavfi tug’iladi. Agarda siz ertalab yangi siqilgan meva sharbatlaridan ichishga odatlangan bo’lsangiz, unda ularni sal shirinroq mevalar, masalan, olma, nok yoki o’rik meva sharbatlariga o’zgartirishingiz mumkin. Аgarda sharbat o’rniga smuzilar tayyorlab ichilsa bormi, nur ustiga a’lo nur bo’ladi. Smuzilar o’zida biriktiruvchi to’qimalarni saqlashi sabab ham juda foydali sanaladi. Sut mahsulotlari Kefir yoki shakarsiz yogurtlarning o’zi och qoringa qabul qilinsa, ular oshqozonga tushib, o’zidagi foydali bakteriya-probiotiklar oshqozon shirasida erib ketib, hech qanday foyda ham keltirmaydi. Pishiriqlar va shirinliklar Shakar inson organizmi uchun zarar keltiruvchi moddalardan biri ekanligi hech kimga sir emas. Xo’sh, och qoringa shirinliklar iste’mol qilinsa nimalar yuz beradi? Ertalab oshqozon osti bezi va jigar hazm qilinishi qiyin bo’lgan taomlarni qabul qilishga tayyor bo’lmaydi. Shakarning qabul qilinishi esa qondagi insulin miqdorini keskin ko’tarib yuboradi. Birozdan so’ng esa yana keskin ravishda pasaytirib tashlaydi va natijada tezda och qolasiz. Shokoladli batonchalar, kruassanlar va shunga o’xshash mahsulotlarning umuman foydasi bo’lmay, hatto qorinni to’q tutmaydi ham. Paketli sharbatlar Paketchali sharbatlarning foydasi juda kam bo’lib, uning asosini ham shakar tashkil qiladi. Bunday sharbatlar och qoringa qabul qilinganda esa ichaklarning tabiiy mikroflorasini buzib, nafaqat zararli, balki foydali mikroorganizmlarni ham yo’q qiladi. Banan Banan juda to’yimli mevalardan biri hisoblanadi. U tarkibida juda ko’p miqdorda vitaminlar, biriktiruvchi to’qimalar, kaliy va magniyni saqlaydi. Ammo erta azondan qorinning och paytida magniyning organizmga tushishi bu mineralning qondagi tarkibini buzadi va natijada yurak faoliyatiga yomon ta’sir ko’rsatadi. Shuningdek kaliyning haddan ortiqligi ham buyraklarning faoliyatiga salbiy ta’sir ko’rsatadi. Bananni nonushtada iste’mol qilish ta’qiqlanmagan, ammo bitta o’zini emas, masalan, bo’tqalarga yoki smuzilarga qo’shib iste’mol qilish mumkin. Bir qarashda yuqoridagi mahsulotlar haqiqatdan ham organizmga salbiy ta’sir ko’rsatishiga ishonish qiyinroq, ammo aynan ular kun bo’yi noqulaylikda yurishimizga sababchi bo’lishlari ham mumkin. Shu sabab ham ovqatlanish tartibingizni birozga bo’lsa ham o’zgartirib, o’zingizga xulosa chiqarib ko’ring. Axir bekorga to’g’ri qilingan nonushta yaxshi kayfiyat garovidir, deb aytishmaydi. Qanday mahsulotlarni och qoringa qabul qilish mumkin, bu haqida esa keyingi maqolamizda bilib olasiz!
https://zira.uz/uz/2019/04/18/