2018 yilda sotilgan uydan soliq to‘laymanmi?
@Yurist_Xizmati 4502-savol:
2015-yili bir odamning nomiga Andijon shaxrining ikkita joyidan Uy olinadi, Usha uylar 2018- sentyabr oyida sotib yuborildi. 2024-aprel oyida Usha odamning nomiga daromad soligi keldi. Shu kelgan daromad soligi tugrimi, shu narsani batafsil tushintirib bering.Shu xakida birorta Karor bormi?
YURIST JAVOBI:
Ma’lumki 2019-yilning 30-dekabrida yangi tahrirdagi Soliq kodeksi qabul qilindi. Sizning holatingizda soliq qarzdorligi eski tahrirdagi Soliq kodeksi amalda bo‘lgan. Lekin mulkiy daromad bo‘yicha ikkala kodeksda ham bir xil qoida ketgan.
Yangi kodeksning 375-moddasiga ko‘ra soliq solinadigan mulkiy daromadlar qatoriga soliq to‘lovchiga mulk huquqi asosida tegishli bo‘lgan mol-mulkni realizatsiya qilishdan olingan daromadlar kiradi. Mol-mulkni realizatsiya qilishdan olingan daromadlar mazkur mol-mulkni realizatsiya qilish summasining hujjatlar bilan tasdiqlangan uni olish qiymatidan oshgan qismi sifatida aniqlanadi. (Bu qoida eksi tahrirdagi kodeksining 176-moddasida keltirilgan.).
✅ Shunday ekan bu borada qarzdorlik bo‘yicha shubha yo‘q. Soliq solinadigan daromad uy-joyning sotib olish va sotib yuborish o‘rtasidagi xarajatlardan tashqari bo‘lgan daromaddan hisoblanadi.
➡️ Endi ushbu soliqni undirish masalasiga kelsak. Bu borada to‘liq yangi tahrirdagi Soliq kodeksiga yuzlanishimiz mumkin. Kodeksning 88-moddasiga binoan soliq organi yoki boshqa vakolatli organ soliq tekshiruvini o‘tkazishga, tekshiruv natijalari bo‘yicha soliq to‘lovchiga soliq qarzini uzish to‘g‘risida talabnoma yuborishga yoki soliq to‘g‘risidagi qonunchilikka muvofiq to‘lanishi lozim bo‘lgan soliqlar miqdorini qayta ko‘rib chiqishga haqli bo‘lgan muddat soliq majburiyati bo‘yicha da’vo qilish muddati hisoblanadi.
Agar ushbu Kodeksda boshqacha qoida belgilanmagan bo‘lsa, soliq majburiyati bo‘yicha da’vo qilish muddati, natijalariga ko‘ra soliq majburiyati aniqlanadigan soliq davri tugaganidan keyin uch yilni tashkil etadi.
Agar soliq majburiyatining yuzaga kelishi muayyan voqea yoki harakat bilan bog‘liq bo‘lsa, agar ushbu Kodeksda boshqacha qoida belgilanmagan bo‘lsa, soliq majburiyati bo‘yicha da’vo qilish muddati shu voqea yoki harakat sodir bo‘lgan paytdan e’tiboran uch yilni tashkil etadi.
❗️Agar sizlarning holatingiz bo‘yicha uylar notarial tasdiqlangan oldi-sotdi shartnomasi bo‘yicha 2018-yil sotilgan bo‘lsa, u holda soliqni undirish bo‘yicha da’vo muddati o‘tib ketgan hisoblanadi. Shunday ekan bu qarzdorlik undiruvga qaratilmasligi kerak.
